Monday, July 24, 2017

அத்வானியின் அரசியல் குற்றம்


modi-advani-kovind-1.jpg (660×440)
அத்வானி ஏன் பிஜேபியால் ஓரங்கட்டப்பட்டார்?
அவருக்கு திறமை இல்லையா?
அவருக்கு அரசியல் அனுபவம் இல்லையா?
அயோத்தி பாபர் மசூதி இடிப்பு கலவரம் மட்டும்தான்
அத்வானியின் அரசியல் தகுதிக்கு களங்கம் கற்பித்ததா?
அத்வானிக்கு ஏன் வாய்ப்புகள் கொடுக்கப்படவில்லை?
அத்வானி செய்த தவறுகள் என்ன?
1) அத்வானி மேற்கொண்ட ரதயாத்திரை.

2) அத்வானி தன் குஜராத் ரதயாத்திரையில் இனம் கண்ட
     நரேந்திரமோதி என்ற தேரோட்டி கிருஷ்ண பரமாத்மா

3) தேரோட்டி அஸ்தினாபுரத்தின் அரியணைக்கு வரக்கூடும்
    என்பதை யும்
     மகாபாரதக் கதையில் இம்மாதிரி திருப்பங்கள் ஏற்படலாம்
   என்பதையும்     அறியத்தவறிய அத்வானி.

4) குஜராத் கோத்ரா மதக்க்கலவரத்திற்குப் பின் ராஜதர்மப்படி
     அன்றைய பிரதமர் வாஜ்பாய் தண்டனை கொடுக்க முன்வந்ததையும்
     நரேந்திரமோதியை கட்சியை விட்டு விலக்கி வைக்க முன்வந்ததையும்
   ஆதரிக்காமல் மவுனம் சாதித்து மோதிக்கு ஆதரவாக இருந்த  அத்வானியின்
   ராஜதர்ம குற்றம்.

5) அரசியலுக்கு அவருடைய வாரிசுகள் வருவதற்கு விருப்பம்
 தெரிவித்தப்பின்    " நான் உயிருடம் இருக்கும் வரை அது நடக்காது, நான்  வாரிசு அரசியலுக்கு     எதிரானவன் " என்று அவர்களைத் தடை செய்தது.

6) இவை எல்லாவற்ரையும் விட அவர் செய்த மன்னிக்க முடியாத குற்றம்
     (பிஜேபி & சங்பரிவார் பார்வையில் )
     தான் பிறந்த மண்ணைப் பார்க்க பாகிஸ்தான் பயணித்தப்போது
    'முகமதுஅலி ஜின்னா - மதசார்பற்றவர் " என்று சொன்னது.


Saturday, July 22, 2017

அப்பாவின் புதல்வர்கள்

அப்பாவைப் போலவே பிள்ளைகளும் இருப்பது நல்லதா ?
அதிலும் அப்பா பிரபலமான தலைவராகவோ நடிகராகவோ
இருந்துவிட்டால் பிரச்சனைதான்.
எப்போதும் பிரபலமான அப்பாவுடன் மகனை ஒப்பிடும்போது
மகனின் ரேட்டிங் என்னவாக இருக்கும்?!!
மகன் அப்பாவை அப்படியே காப்பி ரைட் எடுத்துக்கொண்டு
காரியத்தில் இறங்கினால் தோற்றுத்தான் போவான்.
நான் இன்னாரின் மகன் தான்.
ஆனால் எனக்கு என்று தனிவழி ஒன்றுண்டு, அதுதான் நான்.
. என்று ஒரு தனித்துவத்தைக் காட்டியாக வேண்டும்.
அப்படிக் காட்டத்தவறினால் அந்த மகன் எப்போதுமே
அப்பா நிலைக்கு உயரவும் முடியாது என்பதுடன்
 தன் இடத்தையும் தக்க வைத்துக் கொள்ள முடியாது
 என்பதையும் அறிந்து கொள்ள வேண்டும்.
இதில் மிகவும் அதிகமாக பாதிக்கப்பட்ட உறவு
அப்பா- மகன் தான்.
அப்பா - மகள் உறவு ஒப்பீட்டளவில் அதிகமாகப்
 பாதிப்புக்குள்ளாவதில்லை. (இதுவும் ஒருவகையில் ஆணாதிக்க
வாரிசு, சொத்துடமை சமூக சிந்தனைதான்)

அபிஷேக்பச்சன், பிரபு .. ஏன் தமிழ்நாட்டில் திமுக வின் செயல்தலைவர்
திரு. மு.க .ஸ்டாலின் வரை இது பிரச்சனை தான்.
இதை அவர்கள் எவ்வாறு கையாண்டார்கள்,
 கையாண்டு கொண்டிருக்கிறார்கள்
என்பதைக் கொஞ்சம் உற்றுக் கவனித்தால்
சில நேரங்களில் சிரிப்பு வருகிறது.
 பல நேரங்களில் எரிச்சலும் வருகிறது.
இன்னும் சில நேரங்களில் பார்க்க ரொம்ப
 "ப்பாவமா" இருக்கு!


Wednesday, July 19, 2017

தேனருவி தொகுத்து வழங்கும் கமலஹாசன்

மும்பைவாசி கேட்கிறார்  ,
 எப்படிங்க பிக்பாஸ் கூட அரசியல் களமா மாறியிருக்குனு!
அமிதாப்பச்சன், சஞ்சீவ் தத், சல்மான்கான் போன்ற பாலிவுட்
 சூப்பர் ஸ்டார்கள் கூடத்தான் பிக்பாஸ் ஹோஸ்டாக
இருந்திருக்கிறார்கள். ஏன் கன்னடத்தில் சந்தீப்பும் தெலுங்கில்
ஜூனியர் என் டி ஆரும் ஒலிபரப்பில் இருக்கும் பிக்பாஸ் ஹோஸ்ட்.. அங்கெல்லாம் இத்துணை பரபரப்பு, ஆர்ப்பாட்டம், அரசியல் இல்லை
. உங்க தமிழ்நாட்டில் மட்டும் எப்படி , இப்படி னு கேட்கிறாக.
..அவுகளுக்கு என்னத்த சொல்லிப் புரிய வைக்கிறதுனு
தெரியல.
எங்க ஊரில தேனருவி பாடல்களை கமலஹாசன் 
தொகுத்து வழங்கினால் கூட
இப்படி எல்லாம் ஆகத்தான் செய்யும்னு!

ஓட்டப்பந்தயத்தில் இப்போ என்னவோ
 ரஜினியை முந்திக்கிட்டு உலகநாயகன் ஓடற
மாதிரி இருக்கு..
ரஜினிக்கு அடித்தட்டு மக்களின் ஆதரவு இருப்பதாகவும்
கமலுக்கு இன்டலெக்சுவல் ஆதரவு இருப்பதாகவும்
 சிலர் சொல்கிறார்கள்.
அப்போ அடித்தட்டு மக்கள் இன்டலெக்சுவல் இல்லையானு
 கேட்கப்பிடாது.
எனக்கு இந்தப் பகுப்பாய்வு தெரியல.
ஆனால் இதன் பின்னால் இருக்கும்
இன்னொரு அரசியல் தெரிகிறது.
கமலு எப்படி பார்த்தாலும் பார்க்க சிவப்பா அழகாதான்  இருக்காரு.
ஊறுகாய் மாதிரி நாயக்கரைத் தொட்டுப்பாரு. நாத்திகம் கூட பேசுவாரு.
அப்படியே ஆப்கானிஸ்தான் போயி தீவிரவாதிகளைச்
 சுட்டுத்தள்ளுவாரு.
நல்லா பரதநாட்டியம் வேறு ஆடுவாரு.
வெளிநாட்டு பல்கலை கழகத்திற்கெல்லாம் போயி
பேசிட்டு வந்திருக்கார்னா
அவரு பெரிய்யா ஆளா தானே இருக்கனும்!

பாவம் ரஜினி.. மொட்டையும் சொட்டையுமா.. !
வரப்போறேன் வரப்போறேன்னு சொல்லிக்கிட்டே நாளையும் பொழுதையும்
கடத்திட்டா இப்படித்தான் ஆகிடும்..
சரி .. சரி.. போகிற  போக்கில் வெளியில் இருந்து கமலுக்கு ஆதரவுனு சொல்வாரோ என்னவோ.!!

வடிவேலு மைண்ட் வாய்ஸ் இப்போ பார்த்து ..
சிவப்பா அழகா இருக்கிறவங்க என்ன சொன்னாலும்
எது செய்தாலும்
அது அறிவாளித்தனமாத்தான் இருக்கும்..

சிவ சிவா.. தாங்க முடியலடா சாமீ..


Monday, July 17, 2017

நாளும் கிழமையும்

காலநிர்ணய் என்ற தமிழ் நாட்காட்டி எம்மைப் போன்று
வெளிமாநிலத்தில் வசிக்கும் பலருக்கும் தமிழ் மாதத்தின் சிறப்பு நிகழ்வுகளையும் நம் பண்டிகைகளையும் அறிந்து
கொள்வதற்கு பயன்பாட்டில் இருக்கும் நாட்காட்டி/காலண்டர்.
பெரிதாக அதைப் பார்த்து தான் எதையும் செய்கிறோம்
என்றெல்லாம் சொல்வதற்கு ஒன்றுமில்லை என்றாலும் கூட
ஆங்கில மாதத்தின் நாட்களுக்கு இணையான தமிழ்
மாத நாட்களை அறிந்து கொள்வதற்கு மிகவும் பயனுள்ளதாக
 இருந்து வருகிறது.

அதன்படி நடப்பு ஆண்டு  ஐப்பசி மாதம் 6 ஆம் தேதி என்று என் காலநிர்ணய் அந்த நாள் 22/10/2017 ஞாயிறு கிழமை என்று காட்ட நானும் ஒப்புதல் கொடுத்துவிட்டேன். ஞாயிறு விடுமுறை நாள் என்பதால்.
ஆனால் இப்போது ஐப்பசி மாதம் 6 ஆம் நாள் திங்கட்கிழமை
அதாவது 23/10/2017 என்பதே சரியானது என்று அறிகிறேன்.
காரணம் தமிழ் காலநிர்ணய்
ஆனி மாதத்திற்கு 32 நாட்கள் என்று கணக்கிடாமல் 31 நாட்கள்
 என்று ஒரு நாளைக் குறைத்து கணக்கிட்டிருப்பதால்
ஆனி மாதத்திற்குப் பின் வரும் தமிழ் மாதங்களின் நாட்களும்
ஆங்கில மாத நாள் கிழமைகளும் குளறுபடி ஆகின்றன.
காலநிர்ணய் என்ற நாட்காட்டி சற்றொப்ப 200,000 பிரதிகளுக்கு மேல் விற்பனையாகும் நாட்காட்டி. என்பதும்  தமிழில் மட்டுமல்ல, இந்திய மொழிகள் அனைத்திலும் வெளியாகும்நாட்காட்டி என்பதும்
இதன் தனிச்சிறப்பு.
தமிழ் மாத நாட்காட்டியின் ஆசிரியராக இருப்பவர் என் இனிய
நண்பர் மும்பை சரவணன் என்பதும் நினைவில் வருகிறது.
எப்படியோ ... சரவணா.. இந்த 30 நாள், 31 நாள், 32 நாள், 28 நாள் , 29 நாள் கணக்கெல்லாம் கொஞ்சம் பார்த்து போடுங்கப்பா..

எல்லா நாட்களும் நல்ல நாட்களே.
24 மணி நேரமும் நல்ல நேரமே..
 என்று வாழும் என்னைப் போன்றவர்களுக்கு பரவாயில்லை.. !
ஆனால் நீங்கள் நாட்காட்டியில் காட்டும்  இந்த
நாளும் பொழுதும் கிழமையும்
பார்த்து பார்த்து காரியமாற்றும் பொதுஜனங்களின்
 நிலையை எண்ணிப் பாருங்கள்.

Sunday, July 16, 2017

யாதும் ஊரே!

யாதும் ஊரே யாவரும் கேளிர்
அட போங்கப்பா
பொறந்த ஊரில் பொழக்க முடியாமல்
ஊர் ஊரா அலைஞ்சவனின் உளவியல் பேசி
என்னை மயக்காதீர்.
அது என்ன அடுத்த வரி..
ஆங்... தீதும் நன்றும் பிறர்தர வாரா வா..
ஆமாண்டா.. 
ஈழத்தில் விதைச்ச விதையும்
ஈராக்கில்  வெடிச்ச விதையும்
அவனவன் தலைவிதியாடா..?
போங்கடா போங்க
பெரியோரை வியக்காமல்
சிறியோரை இகழாமல்...
ச்சீ ச்சீ ..ரெளத்திரம் பழகாத மானங்கெட்ட பொழப்பு
நாய்கள் குரைப்பதில்லை. ஜாக்கிரதை.




Friday, July 14, 2017

பனிலிங்கம்


பனிலிங்கம்
-----------------
இரவும் பகலுமற்ற நீண்ட பொழுதுகள்
சக்கரங்களின் ஓசைகள் மவுனித்த சாலை
காற்று சயனித்திருக்கும் காலம்
அலைகளின்ஆராவாரத்தை அடக்கிய நிலவின் தீட்டு
பனிமலைச் சிகரத்தின் வழி எங்கும்
ஏகே 47 துப்பாக்கி கண்கள் துரத்துகின்றன.
ஹே.. புனிதவதி..
உன் புத்திரன் கொடுத்த கருவைச் சுமந்து பயணிக்கிறேன்.
அவன் சந்நிதானத்தில் பிரசவிப்பேன்
என் புதல்வியை.
ஹே.. லிங்கேஷ்வரா.. சென்னிமல்லிகார்ஜூனா
பனிலிங்கம் உருகி உருகி..
என் சமவெளி எங்கும்.
ஓம் நமசிவாய..

Monday, July 10, 2017

சூல் நாவல் முன்வைக்கும் சமூக அரசியல்

சூல் நாவலின் கதை நிகழும்   காலம், களம் சார்ந்த அரசியல் பார்வை
---------------------------------------------------------------------------------------
30p9.jpg (400×505)
"நீர்ப்பாய்ச்சியின் நீர்மேலாண்மை அறிவைக் கொண்டாடுவது என்பது வேறு.
அந்த அறிவு அவனுக்கு தலைமுறை தலைமுறையாக வருகிறது என்று குலத்தொழிலாக்குவது ஆபத்து"
"சூல் கொண்ட கண்மாய் காணாமல் போனதற்கும் திராவிட அரசியலுக்கும்
என்ன தொடர்பு? "
"அதிகாரக் கட்டிலில் இருந்தவர்களின் அடையாளம்  மறைக்கப்பட்டும்
மறக்கப்பட்டும் இருப்பது வெறும் கற்பனை மட்டுமா?"
... சூல் நாவலை முன்வைத்து ...
....

நாவல்கள் கற்பனையானவை. நாவல்களின் கதைப் பாத்திரங்கள் கற்பனையானவை. எல்லாம் லாஜிக்கலா ஏற்றுக்கொள்கிறோம். ஆனால் அந்த நாவலை எழுதுகிற எழுத்தாளனும்
அந்த நாவலில் எழுத்தாளன் காட்டும் மனிதர்களும் எழுதுபவனைப் பொறுத்தவரை கற்பனை அல்ல. அதனால் தான் வாசிக்கிறவனும் எழுதுகிறவனும் கற்பனை உலகில் ஒரே வேகத்தில் சஞ்சரிக்க முடிகிறது. கற்பனைகள் நிஜங்களாகவும் நிஜங்கள் கற்பனைகளாகவும்
நிகழும் ஒரு ரசவாத வித்தையை நிகழ்த்துவதில் தேர்ந்த எழுத்தாளன் வெற்றி பெறுகிறான்.
சில நாவல்களில் கதை நிகழும் களம் கதை மாந்தர்களையும் அக்கதை ஓட்டத்தையும் வாசகனுக்கு மிகவும் நெருக்கமாக்கி விடுகிறது. இன்னும் சில நாவல்களில் கதை நிகழும் களமும் கதை நிகழும் காலமும் ஒன்றுடன் ஒன்றிணைந்து கதை ஓட்டத்தில் பிரிக்கமுடியாத சரடாக பிணைக்கப்பட்டிருக்கிறது. இம்மாதிரி நாவல்களில் கதைக் களம் ஏன் முக்கியத்துவம் பெறுகிறது என்பதும் கதையின் காலம் ஏன் கவனத்திற்குள்ளாகிறது என்பதையும் கவனிக்க வேண்டும்.
 கதைக்களமும் காலமும் கதையைத் தீர்மானிக்கின்றன.

இம்மாதிரி எழுதப்படும் நாவல்களின் ஊடாக வெளிப்படுத்தப்படும் நுண்ணிய அரசியல் என்ன? அதை எப்படி எடுத்துக்கொள்வது?என்ற புள்ளியில் குவிகிறது இப்பார்வை.

கடந்தகால மனிதர்களின் வாழ்வியலும் இயற்கையுடன் ஒட்டிய அவர்களின்
வாழ்க்கை, நம்பிக்கை , சடங்குகள் ஆகியவையும்  கதை ஓட்டத்தில் முக்கியமான  பங்களிப்பை வழங்கும் போது திறமையான எழுத்தாளன்  கடந்தகாலத்தைப் பொற்காலமாக்கிவிடுகிறான். சாதிய சமூகத்தில் அவன் படைத்துக்காட்டும்பொ ற்காலம் (?) சமூகநீதி என்ற ஆகச்சிறந்த சமூக அறத்தின் முன் புறக்கணிக்கப்பட்டிருப்பதை
வாசகன் வெளிப்படையாகத் தெரிந்து கொள்வதற்கும் அப்படியே தெரிந்து கொண்டாலும் அதை வெளிப்படுத்துவதற்கும் தயக்கம் காட்டுகி சூழல் நிலவுகிறது.
காரணம் .. குறிப்பிட்ட எழுத்தாளனின் அக்குறிப்பிட்ட படைப்பு பலராலும் கொண்டாடப்பட்டும் பல விருதுகள் பெற்றும் ஆகச்சிறந்த படைப்பு என்ற
அடையாளத்தை பெற்றபின் அப்படைப்பில் நுண்ணரசியலைக் காண்பது
சாதிய மனோபாவமாகி விடும் என்று அச்சம் கொள்கிறான் அதைக் கண்டுணரும் வாசகன். 
கல்யாண வீட்டிலிருந்து கருமாதி வரைக்கும் சாதிய சமூகமாகவே வாழும் சமூகத்தில் அவனுக்கு படைப்பாளன் முன்வைக்கும் சாதி அரசியலைப் பேசுவதற்கு மட்டும் தயக்கமாக இருக்கிறது!  இது என்ன மாதிரியான புரட்சிகரமான மனநிலை என்பதை விட இம்மாதிரியான ஒரு மனநிலைக்கு அவனைத் தள்ளிவிட்டதில் நம் தமிழ்ச் சமூகத்தின்
சாதிமுகம் அசைக்க முடியாத ஒரு  தூணாக நின்று கொண்டிருக்கிறது..

அண்மையில் வாசித்த சோ. தர்மனின் சூல் நாவல் மிகவும் உன்னதமான படைப்பு. ஆனால்
சூல் முன்வைக்கும் அரசியல் ?
சூல் முன்வைக்கும் சமூக நீதி?
சூல் முன்வைகும் சாதி சமூகம்?
சூல் முன்வைக்கும் சமூகப்படிநிலை?
இதெல்லாம் என்னவாக இருக்கிறது.?

நீர்ப்பாய்ச்சி என்ற கதாப்பாத்திரம் கதை ஓட்டத்தில்
 "சூல்" என்ற கருவுடன் மிகவும் நெருக்கமான கதைப்பாத்திரம்
. நீர்ப்பாய்ச்சி சாதி சமூகத்தில் பள்ளர் சமூகத்தைச் சார்ந்தவன்
என்பதும்  அவர்களின் நீர்மேலாண்மை குறித்தும் சிலாகித்து பக் 482ல் பேசப்படுகிறது.
"நம்ம ஜமீன்கள்ள உள்ள அத்தன கண்மாய்களையும் ஒங்க ஜாதிக ஆட்கள் கிட்டத்தான் ஒப்படைக்கனும்னு வெள்ளக்காரன் உத்தரவு. ஏம்னா வெள்ளாம செய்யறதுலயும், நீர்ப் பாய்ச்சுறதலயும் பள்ளர்கள மிஞ்ச இங்க ஆட்களே இல்லனு சொல்றான், சும்மா சொல்லல லண்டன்லருந்து இங்க வந்து பல வருஷன் ஆராய்ச்சி பண்ணி சொல்றான்.........
நீர்ப்பாய்சுற உரிமை பள்ளர்களுக்குத்தாம்னு பட்டயமே குடுத்திட்டான். அதனாலதான் ஒனக்கு இந்த உரிமையை ஜமீன் குடுக்குது.."
மேலும் பக் 480 ல் இதே கருத்து குப்பாண்டிசாமியின் சொற்களிலும் வெளிப்படுகிறது.
"அடேய் சாவிய ஒப்படைக்கிறது லேசுதாண்டா. ஆனா கண்மா வம்பாப் போகுமடா.வேற ஆருக்குடா அந்த நெளிவு சுளிவு தெரியும்? ........
மூச்சடக்கற சூட்சமம் ஒங்க பரம்பரைக்கு மட்டும் தான் தெரியும். அதப்படிக்க
எம்புட்டு பாடுபடணும்? ஊரு சீரழியப் போறது நிச்சயம்டா............கண்மா சீரழிஞ்சா இந்த ஊரே காலி, ஏம்னா ஊரெல்லாம் புள்ளத்தாச்சிய இருக்கணும், கண்மா எப்பவுமே நெற சூலியாகவே இருக்கணும். நெற சூலியும் தெய்வமும் வேற வேறல்ல.."
கதை ஓட்டத்தில் கண்மாயும் நீர்ப்பாய்ச்சியும் குப்பாண்டி சாமி எதிர்காலத்தை
குறித்து வைக்கும் கருத்துகளும் நிகழ்கால அரசியலுடன் சேர்த்து வாசிக்கப்படுகின்றன.
வாசகனுக்கு நீர்ப்பாய்ச்சி என்ற கதைப்பாத்திரத்தின் குணாதிசயங்களும்
நீர்மேலாண்மையும் பேசப்படும் போதும் கொண்டாடப்படும் போதும்
நீர்ப்பாய்ச்சி என்ற சாதி சமூகத்தின் குலதொழிலும் சேர்த்தே கொண்டாடப்படுகிறது.
நீர்ப்பாய்ச்சிகள் நீர்ப்பாய்ச்சிகளாக இல்லாமல் போய்விட்டதால் கண்மாய்கள்
காணாமல் போய்விட்டன.ஊரே காலியாகிவிட்டது.. என்ற இன்னொரு தளத்திற்கு கொண்டுவந்து நிறுத்துகிறது.
புதினம் முன்வைக்கும் இன்னொரு முகம் என்ன சொல்ல வருகிறது?
நீர்ப்பாய்ச்சியின் மகன் நீர்ப்பாய்ச்சியாக இருக்க வேண்டும் என்பதைத்தவிர
நீர்ப்பாய்ச்சியின் குலதொழிலைக் கொண்டாடுவதிலும் நீர்நிறைந்த கண்மாய்
சூல் கதையின் முகமாக இருப்பதும் நம் கவனத்திற்குரியதாகிறது.

நீர்ப்பாய்ச்சியின் மகனுக்கு நீர்மேலாண்மை அறிவு குலத்தொழிலாய் வாரிசு வழி அவன் அறிவு மேலாண்மை என்று ஏற்றுக்கொண்டால்
ஆடுமாடுகள் மேய்ப்பவன், துணிகள் வெளுப்பவன், சுடுகாட்டில் பிணம் எரிப்பவன், கழிவறை சுத்தம் செய்பவன், களை எடுப்பவன், இத்தியாதி .. எல்லா தொழிலும் கூட வாரிசு வழி குலத்தொழிலாகி அனுபவமே அறிவின் மேலாண்மையாக அந்தந்த தொழிலையும்
அத்தொழில் வாரிசு வழி வருவதையும் ஏற்றுக்கொள்வதுடன் கொண்டாடவும் வேன்டிய நிலைக்கு நாம் தள்ளப்படுவோம். !

இந்த  நாவல் முன்வைக்கும் வெளிப்படையான இன்னொரு அரசியல்
எதிர்மறையாக சித்தரிக்கப்பட்டிருக்கும் திராவிட இயக்கம்...
கதையின் பிற்பகுதியில் திராவிட இயக்கமும் திராவிட இயக்கத்தின்
சமூக  நீதி கருத்துகளும் பெண்ணிய விடுதலை கருத்துகளும் கிராமத்து
கதைப் பாத்திரங்களின் உரையாடல்களின் ஊடாக கேலிக்குரியதாக
சித்தரிக்கப்பட்டிருக்கிறது என்பதும் தான்.
 கதை ஓட்டத்தில் இப்பகுதியின் காலக்கட்டம்
இந்திய விடுதலைப் போராட்டத்திற்கு பிற்பட்ட காலக்கட்டம்.
அதாவது 1947க்குப் பின். இந்திய சுதந்திரத்திற்கு பின் நிகழும் சமூக
மாற்றங்கள். தேர்தல், நாவல் பக் 419, அத்தியாயம் 20ல் சுதந்திரதினக்
கொண்டாட்டமும் கொடி ஏற்றி மிட்டாய் வழங்குவதும் விவரிக்கப்படுகின்றன.

சுதந்திர இந்தியாவில் நிகழ்ந்த சமூக மாற்றங்களையும்
அம்மாற்றங்களுக்கு காரணமாக இருந்தது அனைத்துமே திராவிட கட்சிகள் என்ற ஒரு பிம்பத்தை கதை மாந்தர்களின் உரையாடல்கள் தீர்மானிக்கின்றன. கவனிக்கவும்... இந்த உரையாடல்களில்
எங்கும் வெள்ளைக்காரன் ஆட்சியோ வெள்ளைக்காரன்
விட்டுச்சென்ற சமூக மாற்றங்களோ  ஆட்சியின்
மாற்றங்களோ பேசப்படவில்லை. மேலும் சுதந்திரத்திற்கு சற்று முன்பும் பின்னரும்  தமிழகத்தின் ஆட்சிக் கட்டிலில் இருந்தவர்கள்
 காங்கிரசுக்காரர்கள் தானே தவிர
திராவிட இயக்கம் அல்ல. கதைக்களமும் காலமும் இவ்வாறு இருக்க
கதை ஓட்டத்தில் சமூகத்தில் நிகழும் மாற்றங்களை திராவிட இயக்கத்துடனும் நாயக்கர் கட்சியுடனும் மட்டுமே
 தொடர்பு படுத்தி பேசுவது ஏன்?
அதிலும் அரசியல் ஆதாயம் பெறும் நபர்களாகவும் நாயக்கர் கட்சி ஆட்களைக்
காட்டுவது எதனால்? கதை 1967 க்குப் பின் நடப்பதல்ல. ஆனால் வாசிக்கும் வாசகன் சமகால அரசியலுடன் கதை நிகழ்வுகளை  இணைத்து வாசித்து " ஆஹா ஓஹோ" என்று புகழ்கிறான்.
திராவிட இயக்கமோ திராவிய இயக்கத்தின் பெரியாரோ நாவலாசிரியரின் கதைமாந்தர்கள் மொழியில் சொல்வதானால்  நாயக்கரோ விமர்சனத்திற்கு அப்பாற்பட்டவர் என்று நிலைநிறுத்துவது எம் நோக்கமல்ல.
ஆனால் எதற்காக எதை முன்வைத்து ஏன் விமர்சிக்கிறோம்
என்பதையும் கட்டாயம் கவனிக்க வேண்டி இருக்கிறது.

தமிழக திராவிட இயக்க வரலாற்ற்றில்
1930 முதல் தந்தை பெரியார் கர்ப்ப ஆட்சி என்ற கருத்து பற்றி பேசி வந்தார். 1930ல் கர்ப்ப ஆட்சி அல்லது கர்ப்பத்தடை என்ற தொகுப்பு நூலை வெளியிட்டார். 1943ல் ஒரு திருமண நிகழ்வில் தான் தந்தை பெரியார்  "பிள்ளைப்பேறுக்கு ஆண் - பெண் சேர்க்கை என்பதுங்கூட நீக்கப்படலாம்.
நல்ல திரேகத்துடனும் புத்தி நுட்பமும் அழகும் திடகாத்திரமும் உள்ள பிரஜைகள் ஏற்படும்படியாக பொலிகாளைகள் போல் தெரிந்தெடுத்த மணி போன்ற பொலிமக்கள் வளர்க்கப்பட்டு அவர்களது வீரியத்தை 'இன்செக்‌ஷன்' மூலம் பெண்கள் கருப்பைகளுக்குள் செலுத்தி நல்ல குழந்தைகளைப் பிறக்கச் செய்யப்படும். ஆண்-பெண் சேர்க்கைக்கும் குழந்தை
பெறுவதற்கும் சம்பந்தமில்லாமல் செய்யப்பட்டுவிடும் " (திராவிட நாடு 21, 28-2-1943. இக்கருத்துகள் தொகுக்கப்பட்ட நூல் "இனிவரும் உலகம்" )
கதை ஓட்டத்தில் திராவிய இயக்கத்தாரின் இப்பெண்ணிய சிந்தனையை
 சூல் கதை மாந்தர்கள் எவ்வாறு அணுகினார்கள் என்பதையும் ஆசிரியர் விவரிக்கிறார். பலநூறு ஆண்டுகள் ஆண் ஆதிக்க சமூகத்தில் வாழ்ந்தவர்களுக்கு பெரியாரின் இப்பரப்புரைகள் அதிர்ச்சியாகவும்
அவர்களின் நம்பிக்கைக்கு எதிரானதாகவும் இருந்திருக்கும் என்பதில் ஐயமில்லை.
ஆண் பெண் சேர்க்கை இல்லாமல் குழந்தைப் பெறமுடியும் என்ற பெரியாரின் கருத்தை கதையின் வயதான கதைப்பாத்திரம் கேலியும் கிண்டலுமாக பேசுவதில் நியாயமும் இருக்கிறது.
முதியவரான சின்னையாவுக்கும் வாலிப பருவத்தின் சின்னாவுக்கு நடக்கும் உரையாடல்.
சின்னையாவை கோழிப்பண்ணையைப் பார்த்துக்கொள்ள சொல்லி கோழிப்பண்ணை வேலைக்கு
அழைக்கிறான் சின்னா. பக் 459
"தாயோளி.. என்னயப் போயி கோழி மேய்க்க வாராயனு கேக்கயே, ஒனக்கு கல்யாணம் முடிஞ்சு
இத்தனை வருஷமாச்சு ஒரு புள்ள பூச்சி இல்ல. உங்க தலைவரு கச்சி நாயக்கருக்கும் புள்ள கொல்லி இல்ல. நீங்க ரெண்டு பேரும் ஒங்க பொண்டாட்டி மாருகள கூட்டிட்டுப் போயி
ஊசிப் போடுங்க. புள்ளப் பொறக்கானு பாப்பம். தாயோளி ஆருகிட்ட வந்து கத விடுறங. சேவல்
இல்லாம பொட்டக் கோழி முட்ட இடுதாம். கிடாறி ஏறாம மாடுக கன்னுக்குட்டி போட்டு
பால் குடுக்குதாம். அப்புறமென்ன ஆம்பள இல்லாம பொம்பள புள்ளப் பெற வேண்டியதான? போங்க  போயி ரெண்டு பேரும் பொண்டாட்டிகளுக்கு ஊசி போடுங்க.."
2016ல் வெளிவந்த சூல் நாவலில் இந்த வரிகளை வாசிக்கும் போது
எதெல்லாம் முடியாது என்று அன்றைய மக்கள் நம்பி இருந்தார்களோ அவை அனைத்தும் இன்று ரொம்பவும் சாதாரண நிகழ்வாகி போய்விட்டன என்ற ஓர்மையுடன் அந்த வரிகளைக் கடந்து வர முடிகிறது. ஆண் பெண் உறவு இன்றி பிள்ளை பெறுவதை அன்றைய சமூகம் இப்படித்தான் எதிர்க்கொண்டிருக்கும் என்பதையும் நம்மால் புரிந்து கொள்ள முடிகிறது.
ஆனால் கதை ஓட்டத்தில் கச்சி நாயக்கரின் பொண்டாட்டியும் பேசு பொருளானதில் இருக்கும் அரசியலை எந்த வகையில் சேர்க்க முடியும்?

ஒரு தகவலுக்காக இச்செய்திகள் :
திருமணம் ஆன இரண்டாண்டுக்குப் பின் பெரியாருக்கு பெண் குழந்தை பிறந்ததையும் நாகம்மையார் அழகான பெண் குழந்தைக்குத் தாயானார் என்பதும்  ஆனால், அந்தக் குழந்தை ஐந்து மாதங்களில் இறந்துவிட்டது என்பதும் நினைவுக்கு வருகிறது.
&
சூல் நாவலின் : கதைக்களம் தமிழகம். அல்லது அன்றைய மெட்ராஸ் பிரசிடென்சி.
காலம் :  சுதந்திரத்திற்கு முன்னும் பின்னும்.
அக்காலத்தில் மேற்கண்ட மாநிலத்தை ஆட்சி செய்தவர்கள் :
1920  - 1937  வரை ஜஸ்டிஸ் பார்ட்டி
1937 - 1939 ராஜாஜி - காங்கிரசு கட்சி
1939 - 1946 - கவர்னர் ஆட்சி
1946 - மார்ச் 1967 வரை - காங்கிரசு கட்சி


Wednesday, July 5, 2017

ஊழலை விட ஆபத்தானவை

காங்கிரசும் மகாத்மாவும் இந்திய தேசியமும் சாதிக்க முடியாததை
பிஜேபி சாதித்துவிடுவோ என்று அச்சமாக இருக்கிறது.
ஊழல் செய்த அரசியல் தலைவர்கள் தண்டிக்கப்பட வேண்டும்
என்ற அரசியல் நியாயங்களுடன் ஒவ்வொரு காயாக ஆட்டத்திலிருந்து
அவுட் ஆகி கட்டத்துக்கு வெளியே தூக்கி எறியப்படுகிறது.
இந்த அரசியல் சதுரங்க வேட்டையில் மாநிலக் கட்சிகளும்
மாநிலக் கட்சிகளின் தலைவர்களும் வேட்டையாடப்படுகிறார்கள்.
பொதுவாக நோக்கும் போது பெரிதும் நியாயமாகத் தெரியும் 
இச்செயல்பாடுகள் அனைத்துக்கும் காரண காரியங்கள் உண்டு.
அவை ஊழலையும் விட ஆபத்தானவை.
 ஊழல் தவப்புதல்வர்களையும் தவப்புதல்விகளையும்
காப்பாற்றுவது நம் நோக்கமல்ல என்பதால் கையறுநிலையில்
நாமும் தண்டனையை அனுபவிக்க வேண்டியதுதான்.
நாம் செய்த குற்றமெல்லாம் அவர்கள் ஊழல் செய்த போது
கண்டு கொள்ளாமல்ல் அவர்கள் இலவசமாகக் கொடுத்த தொலைக்காட்சியில்
கையில் ரிமோட்டுடம் உட்கார்ந்திருந்தது மட்டும் தான். !

Friday, June 30, 2017

இதற்குத்தானே ஆசைப்பட்டாய் கு.குமாரா






இதற்குத்தானே ஆசைப்பட்டாய்  குஜராத் குமாரா..

swatch-bharat.jpg (758×290)

இதற்குத்தானே... ஆஹா..
தூய்மை இந்தியா திட்டத்தின் அடையாளமாக இந்திய தேசப்பிதா
 மகாத்மா காந்தியை பிஜேபி அரசு தூசி தட்டி கழுவி ஏற்றிய போதே
 தெரியும்.. இப்படி எல்லாம்  காந்தியை அவர்கள் கொண்டுவந்து நிறுத்துவார்கள் என்பது!
கேட்டால் காந்தி தானே சொன்னார்..
 "இறைத்தன்மைக்கு அடுத்தது தூய்மைநிலை " 'cleanliness is next to godliness'
விளைவு... ..???
குப்பைத் தொட்டி, குப்பை லாரி, கழிவறை,
அரசின் கட்டணக் கழிவறை...
இத்தியாதி இடங்களில் எல்லாம் மகாத்மா காந்தியின்
கண்ணாடியும் மொட்டைத்தலையும்
கைத்தடியும்.. ராட்டையும்..
(சினிமா தியேட்டரில் ஆண்- பெண் கழிவறை அடையாளத்திற்கு கவுண்டமணி, மற்றும் அவர் மனைவியின் போட்டோவைப் போட்டு அடிவாங்கும் செந்தில் நகைச்சுவை காட்சியை கொஞ்சம்  ப்ஃளாஸ்பேக் போட்டு பார்த்துக்கொள்ளுங்கள்)
இதைக் கண்டு அரசியல் கட்சிகளோ காங்கிரசோ கண்டணம் தெரிவிக்கவில்லை.
The judgment comes following a public interest litigation field by Badruddin Qureshi at Chhattisgarh High Court.
பொதுஜன நலம்விரும்பி தொடுத்த வழக்கில் சத்தீஸ்கர் உயர்நீதி மன்றம் தீர்ப்பு வழங்கி இருக்கிறது.
 இம்மாதிரியான இடங்களில் காந்தியின் அடையாளங்கள்
  தவிர்க்கப்பட வேண்டும் என்று.
தீர்ப்பு இன்னும் நடைமுறைக்கு வந்துவிட்டதா தெரியவில்லை. மாநகராட்சியும் மாநில அரசும் எங்களுக்கு இன்னும் அதிகாரப்பூர்வமாக அறிவிக்கப்படவில்லை என்று சொல்லிக் கொண்டிருக்கிறார்கள்.

இதற்குத்தானே ஆசைப்பட்டாய் குஜராத் குமாரா..

GST ஜீ பூம்பா


GST    ஜீ பூம்பா..



ஒரு தேசம் ஒற்றை வரி
காஷ்மீரும் கன்யாகுமரியும் ஒன்றாகிவிட்டது.. ஆஹா..
தமிழ்நாடும் பீஹாருன் ஒன்றாகிவிட்டது..
GST .. ஜீ பூம்பா.. GST .. ஒரு மந்திரச்சொல்.. ஜீ பூம்பா.
GST .. GST .. GST ..

இதுதான் தற்போது நம் நாடாளுமன்றத்திலும் மேல்சபையிலும் ஏற்றுக்கொள்ளப்பட்டிருக்கும்
GST ..
நாளை முதல் /ஜூலை 1 முதல் அமுலுக்கு வரப்போகும் GST ..
பல்வேறு மறைமுக வரிகளை நீக்கிவிடும் என்றும் இடைத்தரகர்கள் இருக்கமாட்டார்கள்
என்றும் ஆகையினால் பொதுமக்களுக்கு குறைந்த விலையில் அன்றாட பொருட்கள்
கிடைக்கும் என்றும் மோதி அரசு அலங்காரமான அறிவிப்புகளுடன் தேசம் முழுமைக்குமான
ஒற்றை வரி முறையை உரக்கப் பேசுகிறது.
ஆனால் இந்தியச் சட்டப்படி இந்தியாவிலிருக்கும் அனைத்து மாநிலங்களும் ஒரே வரி விகிதத்தைக் கடைப்பிடிக்க வேண்டும் என்ற கட்டாயமில்லை.
அத்துடன் அரசு வசூலிக்கும் வரிகள் மூன்று வகையாக இருக்கின்றன
நடுவன் அரசு வரி
மாநில அரசு வரி
நடுவண் அரசும் மாநில அரசும் சேர்ந்து வசூலிக்கும் வரி.

இந்த மூன்று முறைகளை எப்படி ஒற்றை வரி முறையில் கொண்டுவர இருக்கிறார்கள் என்பதைப் பற்றி இதுவரை எந்த ஒரு செயல்திட்டமும் அரசு வெளியிடவில்லை.
பொருட்களின் கொள்முதல் விலையை
வியாபாரிகள் அவர்கள் இலாபத்திற்கு ஏற்ப தீர்மானிக்கும் வசதியை வழங்கி இருப்பதால்
பொருட்களுக்கான வரி விகிதம் மட்டுமே பொருட்களின் விலையை மலிவாக்கும் என்பதும் பொதுமக்கள் பலனடைவார்கள் என்பதும் ஏற்றுக்கொள்ள முடியாதவை.

இவை எல்லாவற்றையும் விட இன்னொரு முக்கியமான கருத்து... பரந்த இந்திய தேசத்தின்
பூகோள ரீதியான நிலப்பரப்பை நடுவண் அரசு கண்ணை மூடிக்கொண்டு செயல்பட்டிருப்பது தெரிகிறது. அதுவும் குஜராத்தில் முதல்வராக இருந்த மோதி. குஜராத்தின் வரி விதிப்பு ஏன் மற்ற மாநிலங்களின் வரி விதிப்பிலிருந்து வேறுபட்டிருக்கிறது என்பதை நன்கு அறிந்தவர்.
அதற்கான அனைத்து காரணங்களும் நிர்வாக ரீதியாகவும் அறிந்தவர் தான். இப்போது அவரே சொல்கிறார்... குஜராத்தும் அசாமும் ஒன்றுதான்.
மகாராஷ்டிராவும் தமிழ்நாடும் ஒன்றுதான் என்று!
அவர் டில்லியிலிருந்து எது சொன்னாலும் சரியாகத்தான் இருக்கும். அதை நாம் நம்பியே ஆகவேண்டும்.
(The GST is bound to lead to serious difficulties, and could possibly fail, because it seeks to treat unequal states equally)

இப்படியான ஒற்றை வரிவிதிப்பின் மூலம் மாநில அரசுக்கு ஏற்படும் வரி இழப்பு/ வருவாய் இழப்பை மாநில அரசு எப்படி எதிர்கொள்ளப்போகிறது? மாநில அரசுக்கு மத்திய அரசு இழப்பீடு வழங்குமா என்ன? அதை யார் தீர்மானிப்பார்கள்? வறட்சி நிவாரணத்திற்கே
ஆயிரம் ரூபாய்க் கேட்டால் வெறும் ஐம்பது ரூபாயை எடுத்து வீசுகிற மத்திய அரசு
மாநில அரசின் வருவாய் இழப்பை எம்மாதிரி அணுகும்?!!


Wednesday, June 28, 2017

காதலுக்கு மூட்டுவலி

4.jpg (244×183)
யாருக்குத்தான் வயதாகவில்லை.
எல்லோருக்கும்தான்.
வளர்ச்சி, இயக்கம் இருந்தால் வயதும் சேர்ந்தே இருக்கும் என்பதுதானே விதி.
நிலவுக்கு வயது உண்டோ ?
அட நிலவுக்கு என்ன.. ?
 நிலவு நேசிக்கும் சூரியனுக்கும் நிலவு மணந்த பூமிக்கும் கூட
வயது உண்டுதான்.
வயதிருந்தால் முதுமையும் இருக்குமா ?
இருக்கும்.
முதுமை இருந்தால் முடிவும் இருக்குமா ?
இருக்கும்.
முடிவெல்லாம் முடிவுதானா ? இல்லை புதிதாக ஒன்றின் ஆரம்பமா ?
இருக்கலாம். வாழ்க்கை ஒரு வட்டம்தானே.
ஒன்றின் முடிவில் மற்றொன்றின் ஆரம்பம்.
ஒன்றே மற்றொன்றாய் புதிதாகப் பிறப்பதும் இறப்பதும் சங்கிலியாக இயக்கம்
 என்ற புள்ளியைச் சுற்றிச்சுற்றி.. இயங்கிக்கொண்டிருக்கிறது.
காதலுக்கு மட்டும் வயதில்லையா ?
என்றும் இளமையானது காதல்.
காதலுக்கு மூப்பில்லை.
காதலுக்கு மரணமில்லை.
காதலுக்கு முடிவில்லை.
காதல்தான் இயக்கத்தின் அச்சு.
இப்படி எல்லாம் காதலித்தவர்களும் சொல்கிறார்கள்,
கவிஞர்களும் சொல்கிறார்கள்.
காதலுக்கு முடிவுண்டு காதலுக்கும் மரணமுண்டு என்றால் பலகோடி உயிர்கள் வருத்தப்படக்கூடும்.
வேண்டுமானால் இப்படி வைத்துக்கொள்வோமா..
காதலுக்கு வயதுண்டு. ஆனால் முடிவில்லாத எண்போல வளர்ந்துகொண்டே இருக்கும்.
எதுதான் பெரிய எண்.. யாருக்குத் தெரியும். அவ்வளவு பெரிய எண்ணை
 எழுதிப்பார்க்க முடியுமா ?
கற்பனை செய்து கொள்ளலாம்.
என்ன இது ? அதிகாலையில் இப்படி ஒரு தத்துவ வேதாந்தம்.
என்ன செய்யட்டும். இன்று தான் பழைய டிரங்க் பெட்டியை எடுத்து சுத்தம் செய்தேன்.
பழுபேறிய சில கடிதங்கள். சில நினவுகள்.
அவன்களின் கடிதங்கள் பல.
அவன்களில் சிலர்களின் பெயர்கள் கூட இன்று மறந்துவிட்டது.
முகத்தை நினைவில் கொண்டுவர முயற்சி செய்துபார்க்கிறேன்.
ம்கூம்.ஒருத்தனின் முகமும் நினைவில் வரவில்லை.
ஏன் இத்தனை வருடங்களும் இந்தக் கடிதங்களை எல்லாம் பூட்டி வைத்துப்
பாதுகாத்தேன் ? தெரியவில்லை.
யாராவது எடுத்துப் படித்திருந்தால் என்னவாகியிருக்கும் ?
அவ்வளவுதான் என்னைப் பற்றி என்னவெல்லாம் பேசி யிருப்பார்கள் ?
அதைக் கற்பனை செய்யும்போது இன்றும் சிரிப்புதான் வந்தது!
சின்னதாக நோட்புத்தகத்தின் பக்கங்களைக் கிழித்து எழுதப் பட்டிருந்தக் கடிதம்.
 குண்டு குண்டான எழுத்துகள். இங்க் பேனாவால் எழுதப்பட்டிருந்தக் கடிதம்.
எழுதியவனின் முகமும் என் நினைவுகளில் கிழிந்துவிட்டதாலோ என்னவோ
 கடித்தத்தை மடித்து வைத்திருந்த மடிப்புகள் கிழிய ஆரம்பித்துவிட்டன.
‘இந்தக் கடிதம் கண்டவுடன் என் காதலை ஏற்றுக்கொண்டால் இக்கடிதத்தை
 உன்னிடமே வைத்துக்கொள்.. ப்டிக்கவில்லை என்றால் இக்கடிதத்தைத் திருப்பிக்கொடுத்துவிடு.. ‘
இன்றுவரை இந்தக் கடிதம் திருப்பிக்கொடுக்கப்படாமல் என்னிடம். என்னிடமே.
அடப்பாவமே.. அவனுடைய காதலை ஏற்றுக்கொண்டோமா ?
அப்படித்தானே அவன் நினைத்திருக்க வேண்டும் ?!!
ஏன் கடிதத்தைத் திருப்பிக்கொடுக்காமல் என்னிடமே வைத்துக்கொண்டேன் ?
அதிலும் அப்போது ஒரு சந்தோஷம் இருந்திருக்குமோ ?
தேதியில்லை. எழுதியவன் பெயரில்லை.
யாருக்கு எழுதியது என்று எதுவும் இல்லை.
மொட்டையாக எழுதப்பட்ட மொட்டைக் காதல் கடிதாசா ?
ஆங்..இப்போ நினைவுக்கு வருது.. அந்த மொட்டை சீனு எழுதிய கடிதம் இது.
குண்டா இருப்பான். அவன் சிரிக்கும்போது அமுல்பேபி மாதிரி இருக்கும்.
அவன் குண்டா இருக்கானு மற்ற பசங்கள் அவனை விளையாட்டிற்கு
 சேர்த்துக் கொள்ள மாட்டார்கள்!
நான் மட்டும்தான் பாவப்பட்டு அவனிடம் பேசிக்கொள்வேன்.
அந்தப் பாவப்பட்டு பேசியதில் வந்தக் காதல் கடிதம்..
இன்னொரு கடிதம்..
சுற்றிலும் கலர் பென்சிலால் பார்டர். அந்தப் பார்டரில் செடியும் பூக்களும்.
நடுவில் சிவப்புக் கலர் ப்பால்பென் எழுத்துகள்.
‘காதல் காதல் காதல்
காதல் போயின்
சாதல் சாதல் சாதல் ‘
என்று கடிதம் முடிவில் ..
நிலவு, பூ, நதி, மீன் என்று என்னவெல்லாமோ வர்ணிப்பு மயம்.
சாண்டில்யனின் கதையிலிருந்து அப்படியே காப்பி அடிச்சமாதிரி.
நீண்டக் கடிதம். இப்போது இதை ஒரு பக்கத்திற்கு மேல் வாசிக்கும்
சுவராஸ்யமில்லை.எழுதியது யார் என்பதையும் கடைசிப்பக்கத்தைப்
புரட்டிப்பார்த்து தெரிந்து கொள்ள ஆர்வமில்லை.
ஹைஸ்கூலில் மாணவிகள் எல்லோரும் ‘A ‘ பிரிவில்.
சிறப்பு பாடம் நடக்கும்போது மட்டும் எல்லா ப்ரிவுகளும் ஒன்று சேரும்.
அல்ஜீப்ரா & ஜியாமெண்ரி எடுத்திருந்தேன்.
A, B. C, D நாலு பிரிவுகள் உண்டு. அப்போது +2 கிடையாது.
SSLC – 11 ஆம் வகுப்பு. அதன் பின் PUC . அப்புறம்தான் பட்டப்படிப்பு.
நான்குப் பிரிவுகளிலும் அல்ஜீப்ரா& ஜியாமெண்ரி எடுத்தவர்கள்
 ஒருவகுப்பில்.அதுபோல சயன்ஸ் எடுத்தவர்கள் ஒரு வகுப்பில். அதுபோல வரலாரு எடுத்தவர்கள் ஒரு வகுப்பில்…
இதில் இவன் ‘C ‘ வகுப்பில் இருந்த சாதிக்பாட்சா.
விளையாட்டில் இவந்தான் முதல்,
நிறைய போட்டிகளில் கலந்துகொள்பவன்.
ஸ்டேட் லெவலில் பங்கெடுத்துக்கொண்டவன். இவனால் பள்ளிகூடத்திற்கு
 நல்ல பெயரும் மதிப்பும். அதனால் எப்போதும் இவனைச் சுற்றி ஒரு கூட்டம்.
 எங்கள் குரூப்பில் எல்லோருக்கும் இவன் மீது ஒரு கண் உண்டு
. இவனுடைய கடிதம் வந்தவுடன் அன்று முழுவதும் என்னவோ
எனக்கே ஸ்டேட் லெவலில் வெள்ளிக்கோப்பைக் கிடைத்த மாதிரி சந்தோஷம். இரட்டைப்பின்னலைப் முன்னால் போடுவதும் முன்னால் போட்டதை எடுத்துப்
பின்னால் போடுவதுமாக…அவன் பார்க்கும்போதெல்லாம் மனசில் குறுகுறுப்பு. அவன் பார்க்காதிருக்கும்போது அவனைப் பார்க்க வைப்பதற்காக எதையாவது
அசட்டுத்தனமாக செய்துவைப்பதும் அவன் வாய்க்குள்ளேயே சிரிப்பதும்
‘ஏய்.. சாதிக் உன்னைத்தாண்டி பார்க்கிறான்.. ‘ என்று தோழிகள் சொல்லும்போது பெருமையாக ‘ ம்ம் தெரியும் ‘ என்று தலையசைத்ததும்..
அப்புறம்.. நான் கல்லூரிப் படிக்கும்போதே அவனுக்கு கல்யாணம் ஆகிவிட்டது.
அவுங்க வாப்பா செய்த பாய் வியாபாரத்தையே இவனும் செய்வதாக
பக்கத்து வீட்டு பாட்டி சொன்னதாக ஞாபகம்.
அதன்பின் ஒரு நாள் கல்லூரி முடிந்து டவுண் பஸ்ஸில் ஊருக்கு வரும்போது
 இவன் இரண்டு குழந்தைகள், மூன்றாவது அவளில் வயிற்றில்
உதைத்துக்கொண்டிருக்க கூட்டத்துடன் முண்டி அடித்துக்கொண்டு
 ஏறியபோது அவளையும் அவள் வயித்தையும் பார்த்து உட்கார்ந்திருந்த
பஸ் சீட்டிலிருந்து எழுந்து இடம் கொடுத்தது ரொம்பவும் தற்செயலாக நடந்தது.
அப்போதுதான் நான் அவனையும் அவன் என்னையும் பார்த்துக்கொண்டோம்.
முட்டுக்கு மேல் உயர்த்திக்கட்டியிருந்த வேட்டியை
என்னைக் கண்டவுடன் சட்டென அவன் கைகள் இறக்கிவிட்டுக்கொண்டன.
அவனையும் அறியாமல் அவன் கைகள் அவன் தலைமயிரைச் சரிசெய்தது.
என்னைச் சந்தித்ததில் அவன் இனம் புரியாதச் சங்கடத்தில் நெளிவதை
 என்னால் புரிந்துகொள்ள முடிந்தது. பாவமாக இருந்தது.
அவன் கண்களைச் சந்திக்காமல் வேறுபக்கமாக
என் பார்வையைத் திருப்பிக்கொண்டேன்.
கல்லூரி வாழ்க்கை பெண்கள் கல்லூரியாகப் போனதால்
 ஒன்னும் சுவராஸ்யம் இல்லை.
இந்த ஸிஸ்டர்களின் கெடுபிடியில் காதல் கடிதங்கள் குறைந்துபோனது.
ஹாஸ்டல் ஒரு சிறைச்சாலை மாதிரிதான். எங்கேயும் வெளியே போகக்கூடாது.
வருடத்தில் ஒரு முறை சினிமா பார்க்க போகலாம்.
 அதுவும் எல்லோருக்கும் ஒரே வரிசையில் டிக்கெட் ரிசர்வ் செய்யப்படும்.
காலேஜ் பஸ்ஸில் எல்லோரும் ஏறனும்.முன்னாலே பின்னாலே வாட்ச்மேன்.
 கூடவே இரண்டு மூன்று ஸிஸ்டர்கள்.
கொடுமைடா சாமி..
ஆனா சும்மா சொல்லப்படாது .. இதிலும் எப்படித்தான் செய்தி பரவிவிடுமோ
சேவியர் கல்லூரிக்கும் ஜாண்ஸ் கல்லூரிக்கும். டிக்கெட் ஹவுஸ் புல்லாயிடும்.
அப்படியே சினிமா முடிந்து வெளியில் வருவதற்குள் நிறைய பார்வைகள்,
 கடிதங்கள்.. பரிமாற்றங்கள்.
இப்படித்தான் அபூர்வராகங்கள் படம் பார்க்கப்போனோம்.
 படம் பார்த்தவுடன் ஹாஸ்டலுக்கு வந்து வார்டனிடம் வாங்கிக்கட்டிக்கொண்டோம்.
‘எவடி.. இந்தப் படத்தை நல்லப் படமுனு சொன்னது..நாங்கள் ஒருவர் முகத்தை ஒருவர் பார்த்துக்கொண்டோம். ‘
வழக்கம்போல நான் முந்திக்கொண்டேன்.
‘பாலசந்தர் படம் மேடம். எல்லா பத்திரிகையிலும் இதைப் பற்றியே பேசிக்கொண்டிருக்கிறார்கள். .அதுதான்.. ‘
பத்திரிகைகள் பேசினா.உடனே நல்லதுனு அர்த்தமா…
அன்றைக்கு எங்கள் எல்லோரையும் ஒரு மணிநேரம் முட்டிப்போட வைத்து
‘ஏசுவே.. என் பிள்ளைகளை மன்னியும் . தொலை தூரத்திலிருக்கும்
 இவர்களின் பெற்றோர்கள் எங்களை நம்பி இவர்களை விட்டிருக்கிறார்கள்..
பிதாவே. இந்த இளம் பிள்ளைகளுக்கு நல்ல புத்தியை நீரே தாரும்..
 எப்போதும் தவறானப் பாதைகளில் செல்லாமல் இவர்களை நீரே
 உம்முடைய கரங்களால் இரட்சித்தருளும். இவர்கள் இன்று அறியாமல் தவறு செய்துவிட்டார்கள் தேவனே.. இந்த உம்முடைய பிள்ளைகளை
 நீரே மன்னியும் பிதாவே.. ‘
ஸிஸ்டர் அழுது அழுது பிரேயர் .. கால் முட்டு வலித்தது.
கண்ணைத் திறந்துப் பார்க்க பயமாக இருந்தது.
எப்படியோ ஒரு வழியாக ‘ஆமென் ‘ சொல்லிவிட்டு வேகமாக ரூமுக்கு
 வந்து மெதுவாக என் பர்சைத் திறந்து அந்தக் கடிதத்தை வாசித்தது .
.கடிதம் எழுதியிருந்தது மூன்றாமண்டு படிக்கும் மாணவன். நான் இரண்டாமாண்டு.
எப்படியோ என் பெயரும் என்னைப் பற்றிய தகவல்களும் தெரிந்துகொண்டவன்.
இந்தக் கடிதம் மட்டும் என்னைச் சந்தோசப்படுத்தவில்லை,
ரொம்பக்கோபப்படுத்தியது.
இங்கிலீஷில் எழுதப்பட்டிருந்தக் கடிதம் .
ஏகப்பட்ட ஸ்பெல்லிங் மிஸ்டேக்.
க்கிராமர்.. கிடையாது. நோ வெர்ப். நோ பாஸ்ட் ப்ரசெண்ட் டென்ஸ் ..
அடப்பாவி.. நீ மூணாவது வருடம் இளங்கலை இறுதியாண்டு.
எந்தக் கல்லூரி இது.. அட.. கர்மமே சேவியர் கல்லூரி..
ரொம்ப பெருமை கர்வம் பிடிச்ச கல்லூரி ஆச்சே..
அங்கே இப்படியும் இருக்கிறார்களா..
என்ன செய்யலாம்.. கடைசியா துணிந்து ஒரு காரியம் செய்தேன்.
 கூட இருந்த ரூம்மேட்ஸ் எல்லாம் ‘அய்யோ அப்படிச் செய்யாதே ‘னு
சொல்லச் சொல்ல கேட்காமல் செய்தேன்.
‘கடிதத்தை அப்படியே வைத்து அந்தக் கல்லூரி பிரின்ஸ்பாலுக்கு ஒரு கடிதம்.
முதலில் உங்கள் மாணவர்களுக்கு உருப்படியாக ஆங்கிலம்
 எழுதக் கற்றுக்கொடுங்கள்.
அதன் பிறகு காதல் கடிதம் எழுதச் சொல்லுங்கள்! ‘ என்று.
எல்லாம் இன்றைக்கும் இருக்கிற அதே அசட்டுத்துணிச்சல்தான்.
சேவியர் பிரின்ஸ்பால் ஃபாதர் ரொம்ப நல்லவராக இருக்க வேண்டும்.
அப்படியே அந்தக் கடிதம் திருத்தி எழுதப்பட்டு எனக்கு வந்தது..
 எங்கள் கல்லூரி வார்டன் முகவரியுடன்!
அவ்வளவுதான்.. கல்லூரி பிரின்ஸிபால் வரைக்கும் கடித மேட்டர் போய்விட்டது.
கல்லூரி புரபோசர்களின் ஸ்டாஃப் ரூமில் ஒரு பட்டிமன்றம்.
 நான் செய்தது சரியா தவறா ? என்று
ஆனா நான் எதிர்பார்த்த மாதிரி எங்க வார்டனோ பிரின்ஸியோ என்னைச் சீட்டுக்கிழிக்கவில்லை.
அவர்களுக்கும் என் துணிச்சல்மீது ஒரு சின்ன சந்தோசமிருந்தது
 என்பதை அவர்கள் வெளிக்காட்டாவிட்டாலும் என்னால் புரிந்துகொள்ள முடிந்தது..
அந்தத் தப்பும் தவறுமான கடிதத்துடன் சேர்த்து எழுதப்பட்டிருக்கும் தவறுகள் இல்லாதக் கடிதம். அதே கவருடம் இன்றும் என் அசட்டுத்துணிச்சலுக்கு அத்தாட்சியாய்.
எப்போதாவது தோன்றும்..இதை எழுதியவனின் மனம் எவ்வளவு காயப்பட்டிருக்கும் என்னுடைய அதிகப்பிரசங்கித்தனத்தால் என்று.
அப்போதெல்லாம் அவன் யார் ? அவன் எப்படி இருப்பான் ?
அவன் பட்டம் வாங்கி இருப்பானா ?
அவனுடைய கல்லூரி பிரின்சிபால் அவனைத் திட்டினாரா ?
அவனிடம் ஒரு சின்னதா ஒரு மன்னிப்பு கேட்டுவிட்டால்
நல்லா இருக்கும்னு அடிக்கடித் நினைப்பு வரும்..முகம் தெரியாத
அவனை பல விதங்களில் மனசு கற்பனைச் செய்துகொண்ட காலங்கள் உண்டு.
அப்புறன் சினிமா ஸ்டைலில் அவனே என்னைப் பெண் பார்க்க வருவதாகவும்
 திருமணம் செய்துகொள்வதாகவும் சண்டை போடுவதாகவும்…
 கண்டபடி கனவுகள் வந்து தூக்கம் கெட்ட இரவுகள் பல உண்டு.
….
இந்தக் கடிதங்களை எல்லாம் ஒரு கவரில் மொத்தமாகப் போட்டுவைத்தேன்.
ஆமாம்.. கிழித்து எறியாமல் எதற்காக இன்னும் குப்பையா சேர்த்து வைக்கனும் ?
சரி இருந்துட்டுப் போகட்டுமே.. இப்போ என்ன ?
என் கணவர் எழுதிய கடிதங்களை வாசிக்க ஆரம்பித்தேன்.
திருமணம் நிச்சயமானவுடன் எழுதி இருந்த முதல் கடிதம்.
அதே எல்லோரும் சொல்ற டயலாக்.
‘உன்னைப் பாத்தவுடனேயே நீதான் எனக்கானவள் ‘ என்பதை என் மனசு சொன்னது! ‘
நிறைய உளறல்கள்.. இப்படியே..
அப்போதெல்லாம் இந்த உளறல்களைத்தான் எத்தனைத் தடவைகள்
 திருப்பி திருப்பி வாசித்திருக்கிறேன்.
அப்படி என்ன புதுசா எழுதியிருந்தார் ?
அப்புறம் திருமணமாகி சில மாதங்களில் அவருக்கு ஆபிஸ் டிரெயினிங்க்
.. ஒரு இரண்டு மாதப்பிரிவு.
அப்போது எழுதியிருந்தக் கடிதங்களைப் பிரித்தால் ‘ஒரே முத்த ம்மழை ‘
சரியான முத்தப் பைத்தியம்.. முத்தப்பிசாசு.. ‘
செல்லமாகத் திட்டிக்கொண்டே அந்தக் கடிதங்களை பத்திரமாக மடித்தேன்.
சின்னவன் பிறந்திருக்கும்போது அம்மா வீட்டில் இருக்கும்போது அவர் எழுதியது..
அவருக்குத்தான் என் மீதும் குழந்தைகள் மீதும் எத்தனை அன்பு, கரிசனம்..
திரைச்சீலைகள் விழுந்து லைட்டுகள் போடப்பட்டு மணி அடித்த மாதிரி..
வாசல் மணி ஒலித்தது. அந்தக் கடிதங்களை எல்லாம் அப்படியே பெட்டியில்
 போட்டுவிட்டு கதவைத் திறந்தேன்.
போஸ்ட்மேன் கடிதங்களைக் கொடுத்துவிட்டுப் போனான்.
அவர் கடிதத்தைப் பிரித்தேன்.
‘நான் அனுப்பிய டிராப்ட் கிடைத்ததா ? இன்சுரன்ஸ் பிரிமியம் கட்டிவிட்டாயா ?
பிள்ளைகளுக்கு அடுத்த மாதம் பீஸ் கட்ட பணம் தேவைப்படும்
 என்பதால் அதிகமாக பணம் அனுப்பி இருக்கிறேன்.
எனக்கு இந்த வருடம் லீவுக்கிடைக்காது என்று நினைக்கிறேன்.எல்லோரும்
லீவில் போவதால் ஓவர் டைம் கிடைக்கும். எப்படியும் ஊரில் ஒரு
வீடு கட்டிவிட்டால்,நாளைக்கு நமக்குத்தானே நல்லது.
உனக்கு மூட்டுவலி எப்படி இருக்கிறது ?
அம்மாவுக்கு பி.பி கண்ட் ரோலில் இருக்கிறதா ?
எனக்கு சுகர் கண்ட் ரோலில் இருக்கிறது. ‘
திறந்து கிடந்த டிரங்க் பெட்டி..
அதில் மடித்து வைக்கப்பட்டிருக்கும் பழையக்கடிதங்கள்..
இரண்டையும் மாறி மாறி பார்த்தேன்.
அமைதியாகப் போய் எல்லா கடிதங்களையும் கிழித்தேன்.
மூட்டுவலி, சுகர், பிரஷர்.. நடுவில்..
அன்புடன் எழுதப்பட்ட அன்புடன் கடிதத்தை
 அன்புடன் மீண்டும் வாசிக்க ஆரம்பித்தேன்…
(மீள்வாசிப்புக்காக. கணையாழி இதழில் அக்காலத்தில் வெளிவந்தக் கதை. 2005ல் வெளிவந்திருக்கும் என் மின்சாரவண்டிகள் சிறுகதை தொகுப்பிலிருந்து)