Saturday, February 24, 2018

பின்னங்களும் தலைகீழ் விகிதங்களும்


Image result for will kamal rajini take dmk aiadmk votes

அரசியல் திரையரங்கில் கமல் ரஜினியின் பாத்திரம் என்ன?
எதற்காக இத்திரைப்படம்?
யார் இயக்குகிறார்கள்?
யார் தயாரிப்பு?
மக்கள் கொடுக்கப்போகும் டிக்கெட்டுகளின் விலை என்ன?
சில பின்னங்கள், சில தலைகீழ்விகிதங்கள்
கூட்டல் வகுத்தல் பெருக்கல் ஈவு சுழி
அல்ஜீப்ரா என்ற கணக்குகள் ஓடிக்கோண்டிருக்கின்றன.
சில பின்னங்கள் தலைகீழ்விகிதங்களாகிவிடலாம்
என்று காய் நகர்த்திக் கொண்டிருக்கின்றன ..
ஆட்டம் எப்படி நடந்தாலும் மகாஜனங்களுக்கு
ஈவு கிடைக்கப்போவதில்லை.
ஏற்கனவே இந்தியாவில் பிறக்கும் ஒவ்வொரு குழந்தையும் 
கடனாளியாகத்தான் பிறக்கிறது !
கமல் குறித்து தேவைக்கு அதிகமாகவே எழுதியவர்களில்
 நானும் ஒருத்திதான். என்ன செய்வது..? என்னைச் சுற்றிய ஊடகமும் சமூக வலைத்தளமும் என்னையும் இயக்கும்
வல்லமைப் படைத்தவை தான்.
எதற்காக கமலும் ரஜினியும் இப்போது அரசியல் களம்
இறங்குகிறார்கள்? அல்லது களத்தில் இறக்கிவிடப்பட்டிருக்கிறார்கள்?
உண்மையில் தமிழக அரசியலில் வெற்றிடம் ஏற்பட்டிருக்கிறதா?
திமுக தலைவர் கலைஞரின் அரசியல் செயலற்ற உடல்நிலையும்
 ஜெ யின் மறைவும் அவர் மறைவுக்குப் பிறகு அதிமுக கட்சியில்
ஏற்பட்ட அதிகாரப் பகிர்வு பிரச்சனைகளும் கோஷ்டிகளும் 
அரசியல் தளத்தில் ஒரு வெற்றிடம் ஏற்பட்டிருப்பதற்கான
 புள்ளியைத் தெளிவாக அடையாளம் காட்டுகிறதா?


அரசியல் கட்சிகள் தேர்தலைச் சந்திக்கும் போதெல்லாம்
 திமுக மற்றும் அதிமுக என்று எதாவது ஒரு திராவிட அரசியல்
கட்சியுடன் மாறி மாறி கூட்டணி சேர்ந்து 
தேர்தலைச் சந்தித்ததன் மூலம் திராவிட அரசியல் 
கட்சிகளுக்கான மாற்று அரசியலாக இருக்கமுடியாத
அவல நிலைக்குத் தள்ளப்பட்டுவிட்டன
அதனால் கமலும் ரஜினியும் திராவிட அரசியல் கட்சிகளுக்கான 
மாற்று அரசியல் சக்தியாக ஊடகத்தால் 
ஊதிப் பெரிதாக்கப்பட்டு ஒலி ஒளி காட்சிகளில்
வலம் வருகிறார்கள். ஆனால் இது சாத்தியமா..?
2016 சட்டசபை தேர்தல் ஓட்டுவிகிதத்தைக் கவனிக்கவும்.
அதிமுக 41% ஓட்டுகள் 176 லட்சம்
திமுக 31% ஓட்டுகள் 136 லட்சம்
மொத்த ஓட்டுகள் 429 இலட்சம்
429 -136-176 = 117
இதில் வருகிற சட்டசபை தேர்தலில் புதிதாக 
ஓட்டுரிமைப் பெறும் வாக்காளர்கள் குறைந்தது 20 இலட்சம் என்று வைத்துக்கொண்டாலும்
மொத்த வாக்காளர்கள் எண்ணிக்கை 450 இலட்சமாகும்.
ஓட்டுப் போடாதவர்களும் வரும் தேர்தலில்
 வாக்களிக்க வந்தால் எல்லாம் சேர்த்து மொத்த 
வாக்காளர்கள் 500 இலட்சமாகலாம்.
நாம் விரும்பினாலும் விரும்பாவிட்டாலும்
 திராவிட அரசியல் கட்சிகள் தங்களிடம் கணிசமான 
வாக்காளர்களையும் கட்சி உறுப்பினர்களையும்
 தக்க வைத்திருக்கின்றன.
அதிமுக ஓட்டுகளைப் பிரிப்பதற்கு அவர்களே போதும்!
திமுக ஓட்டு விழுக்காடு 31% என்பதுதான் தற்போது
தேர்தல் களத்தில் பெரிய எண்! 
கமலும் ரஜினியும் திமுகவின் ஓட்டுகளைக் கணிசமாகப் 
பிரித்தால் மட்டுமே வெற்றி பெறுவதற்கான வாய்ப்புகள் உண்டு.
இதில் கமல் அதிமுக ஆட்சியை மட்டுமே 
சிஸ்டம் சரியில்லை என்று ஒரே போடாக போடுகிறார். 
திமுக ஆட்சியில் கமலைப் பொறுத்தவரை 
சிஸ்டம் ஒழுங்காக இருந்தது! 
இந்த நிலைப்பாடு 
வெளிப்படையாக தெரிந்தாலும் அவரை திமுக நம்புகிறதா? இல்லை ! 
ரஜினியின் ஆன்மீக அரசியலும்
 ரஜினி ரசிகர் மன்றமும் ஓட்டுகளைப் பிரிக்கும்
 வல்லமை கொண்டவை.
இந்திய தேர்தல் முறை ஒவ்வொரு தொகுதியிலும்
 மற்ற வேட்பாளர்களை விட அதிக வாக்குப்பெற்றவரை வெற்றி பெற்றவராக அறிவிக்கும் மெஜாரிட்டி எலெக்ஷன் முறையைப் பின்பற்றுகிறது.
அதாவது 100 வாக்காளர்கள் மொத்தம் உள்ள தொகுதியில்
திமுக 30
அதிமுக குழு 31
இவர்கள் மொத்தம் பெற்ற வாக்குகள் 61 ஆக இருந்தாலும்
 அத்தொகுதியில் 31.5 வாக்குகள் பெறுபவர் வெற்றிபெற்றவராகிவிடுவார்.
எனவே திமுக வும் அதிமுக வும் அவரவர் வாக்குகள் கணக்கை மிகச்சரியாக துல்லியமாகக் கணக்கிட வேண்டும். 
அதிமுக உள்கட்சி பிரச்சனையில்
கணக்கில் கோட்டைவிட்டுவிடுவதற்கான 
சாத்தியக்கூறுகள் அதிகம் இருக்கின்றன.
 திமுக வின் செயல்தலைவர் திரு. ஸ்டாலின் அவர்கள்
கலைஞரைப் போல இந்தக் கூட்டல் கழித்தல் 
கணக்குகளையும் தன்னுடைய ஊகக்கணக்கு 
அதாவது எதிர்காலம் குறித்த ஒரு ஊகம் 
ஆகியவற்றை சரியாகக் கணிப்பாரா ? அல்லது
வாரிசு அரசியல் போராட்டத்திற்கே முன்னுரிமைக்
 கொடுப்பாரா? தெரியவில்லை! 
கமலும் ரஜினியும் அவர்கள் பெரிதும் விமர்சிக்கும் 
திமுக மற்றும் அதிமுக திராவிட கட்சிகளின் 
ஓட்டுகளைப் பிரிக்காமல் தங்கள் அரசியல் கடையில்
 வியாபாரம் நடத்த முடியாது.
திமுக , அதிமுக இரு கட்சிகளுமே 
திரைப்பட நடிகர்களுக்கான கவர்ச்சியை
 மற்றவர்களை விட அதிகமாக அறிந்தவை.
அதனால் தான் தங்கள் கட்சிகளின் ஓட்டுகளை 
இவர்கள் பிரிப்பார்கள் என்ற அச்சம் இருக்கிறது.
காங்கிரசு கட்சியின் ஆட்சியை அடியோடு விரட்டிய
திமுக வின் அன்றைய தம்பியர் படை , திமுக வின்
ஓர் அங்கமாக இருந்து தன் ரசிகர் மன்றத்தை
 வளர்த்துக் கொண்டு தொடர்ந்து அரசியல் சினிமா
 என்ற இரட்டை குதிரையில் பயணித்த எம் ஜி ஆர் 
என்ற நடிகரின் பொதுஜனத் தொடர்பு,
நேற்றுவரை விலை உயர்ந்தக் காரில்
இறங்கி ரசிகர்களைப் பார்க்கும் போது கை அசைத்துவிட்டு 
சென்ற கமலுக்கும் ரஜினிக்கும் இருக்கிறதா,,? 
பொதுஜனத் தொடர்பு என்பதில் எம் ஜி ஆர்
 உண்மையில் மக்கள் திலகமாகவே மிகவும் கவனத்துடன் திரையிலும்
அரசியலிலும் (நடித்தார் ?)தன் பாத்திரத்தை
 சிரத்தையுடன் வடிவமைத்துக் கொண்டார்.
அதற்கான காலம் இன்றைய ரஜினி கமலுக்கு இருக்கிறதா..?
டுவிட்டர், முகநூல் , வாட்ஸ் அப் குரல்களைத்
 தாண்டியது தேர்தல் வாக்காள பெருமக்களின் ஜனத்திரள்.
திமுக அடுத்த தேர்தலில் வெற்றி பெறுவதற்கான
 வாய்ப்புகள் இருப்பதாக நம்பிக்கொண்டிருக்கும் நிலையில்
ரஜினியும் கமலும் திமுகவுக்கு தான் வேட்டு வைக்க
களம் இறக்கப்பட்டிருக்கிறார்கள்!
அதனாலேயே கமலோ ரஜினியோ அரசியல் களத்தில்
வெற்றி பெற்று நாளைய தமிழக முதல்வர்
 ஆகிவிடுவார்களா என்றால் அதுவும் நடக்காது.
அப்படியானால் ஏன் இதெல்லாம் நடக்கிறது?
தமிழகத்தில் வலுவான மாநிலக் கட்சிகள் இருக்கக் கூடாது.
வலுவற்ற ஆட்சி, மைநாரிட்டி ஆட்சி நடக்க வேண்டும்.
தமிழகத்தின் கனிம வளங்களையும் 
கடற்கரை வளத்தையும் மொத்தமாக 
அயல்நாட்டுக் காரனுக்கு குத்தகைக் கொடுக்கவும் 
 விற்கவும் 
இந்தியப் பேரரசுக்கு எவ்வித தடங்கலும் இருக்கக்கூடாது.
காங்கிரசு செய்ய நினைத்து செய்ய முடியாமல் போனதை 
மோதியின் பிஜேபி அரசு செய்து காட்ட நினைக்கிறது.
அவ்வளவுதான். 
அப்பத்தைப் பங்கு வைத்த பூனையின் கதை
வெறும் கதையல்ல.

Wednesday, February 21, 2018

திராவிடஹாசனுக்கு வாழ்த்துகள்

Image result for கமல் கார்டூன்
"காகிதப்பூ மணக்காது."
 "நான் பூ அல்ல., விதை .
என்னை முகர்ந்து பார்க்காதீர்கள்,
விதைத்து பாருங்கள், வளர்ந்து வருவேன் "
"இது   மரபணு மாற்றப்பட்ட விதை ! "
"தலைப்பு செய்தியாகலாம், தலைவராக முடியாது"
நாளை நமதே  திராவிடஹாசன் திரைப்படத்தின்
துவக்க விழாவில் "பஞ்ச்ச் டயலாக்" தூள் கிளப்புது..
இனிமேலாவது நாம பொழைக்கிற வழியைப் பார்க்கனும்னு
என் தோழி வேறு அடிக்கடி போன் செய்து
என்னை உசுப்பேற்றுகிறாள்..
ஒரு கட்சினு ஆரம்பிச்சா
மகளிர் அணி/ இலக்கிய அணி/ மும்பை அணி/
புறநகர் அணி/ அவியல் அணி/, பொரியல் அணி/
சாம்பார் அணி/ இப்படியாக தானே உருவாகும்
எதாவது ஓர் அணியில் நமக்கு ஒரு சீட்டு
கிடைக்காமலா போய்டும்?
அவ காட்டற பரபரப்பை பார்த்தா நமக்கும்
உள்ளங்கை அரிக்கிறது!
இப்பவே டவுண் பஸ்சில் சீட்டைப் பிடிக்கிறமாதிரி
"நாளை நமதே  திராவிடஹாசனுக்கு வாழ்த்துகள்" னு
சொல்லிவைப்போம்.
மண்டைக்காயற மாதிரி யோசிச்சி, தலையணை மாதிரி
புத்தகத்தை வாசிச்சு தலைவலி வந்து கண்ணாடி போட்டு..
அரசியல் எழுதி .. இதெல்லாம் வேஸ்ட்டுனு புரியுது.
எந்த இசமும் தேவையில்ல.
மக்களுக்கு என்ன தேவையோ
அதுதான் கட்சியின் கொள்கை... னு
திராவிடஹாசன் சொல்லியாச்சு..
ஒவ்வொருவரும் அவரவர் தேவையை
 உடனே பட்டியல் போடுங்க
.. சீக்கிரம் .
 முதலில் வருபவருக்கே முன்னுரிமை..


Saturday, February 17, 2018

நவீன இந்தியாவில் நவீன திருடர்கள்

Image result for nirav modi cartoon
யாருக்கும் தெரியாமல் ஓடுகின்ற டிரெயினில்
பேருந்தில் பிக்பாக்கெட் அடிக்கிறவர்களை எல்லாம்
திருடன் டன்  என்று அழைக்கிறோம்.
கையில் அகப்பட்டால் மொத்து மொத்துனு
மொத்தி நம்ம சமூகக்கடமையை நிறைவேற்றிவிடுகிறோம்.
ஆனா ஹெலிகாப்டரில் வந்து இறங்கி
நட்சத்திர ஹோட்டல்களில் பார்ட்டி கொடுத்து
கோர்ட்டும் சூட்டுமாய் வெள்ளையும் சொள்ளையுமாய்
வந்து ஆறேழு வருஷங்களாய் வேண்டியதை
மாமன் மச்சான் என்று குடும்பத்துடன் சேர்ந்து
கொள்ளை அடிச்சிட்டு நிம்மதியா பெல்ஜியம் லண்டன்
என்று பாதுகாப்பாக அனுப்பி வைத்துவிட்டு..
அது என்னடா..
வைரவியாபாரிகள் திருடறதுக்குனு தனிரேட்டா..
14 செப்டம்பர் 2013 நியுடெல்லி ஐந்து நட்சத்திர ஹோட்டலில்
அலகாபத் வங்க்கியின் போர்ட் மீட்டிங்கில் அஜண்டா 4/6
கீதாஞ்சலி ஜுவல்லர்ஸ்க்கு அவர்கள் பெயரில் இருக்கும்
ரூ 1500 + 50 கோடி கடனை வசூலிக்காமல் மேற்கொண்டு
கடன் கொடுக்க கூடாது, " என்று அன்றைய வங்கி டைரக்டர்
துபே சொன்னதை ஏன் அரசும் ரிசர்வ் வங்கியும் நிதித்துறை
மந்திரியும் பிற வங்கி அதிகாரிகளும் நிராகரித்தார்கள்?
I also wrote to the Reserve Bank of India and secretary,
 financial services in the Ministry of Finance in my effort to warn
 them of a massive scam looming large. My request was to take
immediate preventive action and keep a watch on all the companies
 linked to Choksi's firm, as they were accumulating loans
 without making payments to the bank," Dubey said.
11,700 கோடியை சுருட்டிக்கிட்டு பத்திரமா ஒரு குடும்பம்
இந்தியாவை விட்டு போகும் வரை அமைதியா இருந்திட்டு
அவன் போனப்பிறகு ஏன் டா வாயிலும் வயித்திலு அடிச்சிக்கிட்டு
கத்தறீங்க.. மல்லையா ஓடிப்போனாரு.. லலித் மோடி ஓடிப்போனாரு
இப்போ நிரவ் மோடி ஓடிப்போயிட்டாரு..
இப்போ பாஸ்போர்ட்டை முடக்கவும் வங்கி கணக்குகளை
முடக்கவும் அவர்கள் அலுவலகங்களை சீல் வைக்கவும்..
அது எப்படிடா எல்லா முடிஞ்சப்பறம் கடைசியில வர்ற
போலீஸ்காரன் சினிமா காட்சி மாதிரி ..
இந்த லட்சணத்தில வங்கிகளுக்கு இண்டெர்னல் ஆடிட்டிங்க்
ரிசர்வ் வங்கி ஆடிட்டிங்க்னு ஏகப்பட்ட சோதனைகள்
ஆண்டுதோறும் நடக்கும். அத்தனைப் புத்திசாலிகளுமா
இத்தனைக் கடனுக்கும் வரவு இல்லியேனு கவனிக்கல..

போதுமடா சாமி..
ஏற்கனவே காதுகுத்தி கடுக்கண் போட்டிருக்கு
நீங்க எவனும் வந்து  காதில பூ சுத்தாதீங்க..
Image result for farmers suicide in india

வாங்கிய கடனைக் கொடுக்க முடியலையே
வானம் பொய்த்து பயிர்க்கருகி
வாழ்க்கை போயிடுச்சே..
கொடுத்த வாக்கை காப்பத்த முடியலையே
கடன் கொடுத்தவனின் சுடுசொல் தாங்காமல்
தற்கொலை செய்து கொள்ளும் விவசாயிகளும்
இதே மண்ணில் தான் வாழ்ந்து கொண்டிருக்கிறார்கள்.
அடியே .. பராசக்தி..
பாரதமாதக்கி ஜெ. ஜே.

Wednesday, February 14, 2018

அரசியல் டூரிங்க் டாக்கீஸ்

Image result for டூரிங் டாக்கீஸ்

நடிகர்கள் அனைவரும் அரசியல்வாதியாகி சமூகத்திற்கு
 தொண்டாற்ற துடிக்கிறார்கள். இதில் மார்க்கெட் போன நடிகர்கள் மட்டுமல்ல, மார்க்கெட்டில் இப்போதும் இருக்கும் நடிகர்களும் அடக்கம்
. நடிகர்களின் இச்சமூக அக்கறையை நினைக்கும்போது 
புல்லரிக்கிறது. இந்த மாபெரும் மாற்றத்தால் தமிழகம் 
உலக அரங்கில் ஓர் உன்னதமான இடத்தைப் பிடித்துவிடும்
என்றே நினைக்கிறேன். ஹாலிவுட் கூட நம்மிடமிருந்து தான்
 இக்கலையுலக அரசியல் மாதிரியைக் கற்றுக் கொள்ளும் நிலைவரும்.
வரட்டும், வரட்டும். மகிழ்ச்சி.
நடிகர்கள் அரசியலுக்கு வந்துவிடுவதால்அ
ரசியல்வாதிகள் 
அனைவரும் நடிக்கப் போய்விடலாம்! ரொம்ப இயல்பாவும் இருக்கும்!
இந்த மாற்றம் வந்தால் எனக்கென்னவோ
திமுக பேஸ்மெண்ட் ரொம்ப ஸ்ட்ராங்கா இருக்கு! 
கதாநாயகனிலிருந்து அப்பா வேடம், அம்மா வேடம்,
 துணை நடிகர்கள், குணச்சித்திர நடிகர்கள்,
பாட்டு எழுத வசனம் எழுத கதை எழுத... அடேங்கப்பா..
இந்த மாற்றம் வரும்போது அதிமுக
 ஓபிஎஸ் எடப்பாடி பாடு தான் படு சிரமத்திற்குள்ளாகும்!
 கூட நடிக்க நடிகைகள் கிடைப்பார்களா
அல்லது அவர்கள் நிரந்தர வில்லன் ரோலை எடுத்துக் கொண்டு 
அந்தக் காலத்து நம்பியார் அசோகன் வீரப்பா ரேஞ்ச்சுக்கு 
போய்விடுவார்களானு தெரியலை. தயாரிப்பாளர்கள் ஆகலாம்.
இதிலும் தினகரன் தான் தனித்து நிற்கிறார். 
கதாநாயகன் முதல் குணச்சித்திர வேஷம், வில்லன் ரோல்..
 தயாரிப்பாளர் மற்றும் இயக்குநர் எல்லாத்தையும் சேர்த்து
 குக்கரில் போட்டு விசில்
போட வைத்துவிடுவார்!..
இனி, அவரவர் கற்பனைக்கு விட்டுவிடுகிறேன்.
உங்கள் விருப்பம் போல மருத்துவர் இராமதாசு முதல்
 வைகோ வரை.. 
அப்படியே நம்ம தமிழிசை அக்காவையும் விஜயதாரிணி
தங்கச்சியையும் மறக்காமல் சேர்த்துக் கொள்ளுங்கள்.
கட்.. 123.. கட் கட்..

Sunday, February 11, 2018

மரணதேவதை

Image result for goddess of death eternity modern art

மரணம் சுடலைத்தீயின் வடிவத்தில்
சகலத்தையும் எரித்துப் பொசுக்கி தன்னை தன் இருத்தலை
 நிலைநிறுத்திக் கொண்டே இருக்கிறது.
மரணம் எப்போதுமே அழகானது.
அதுவே பிறவியின் நிரந்தரமானது.
சொத்து சுகம் உறவுகள் ஆள்பலம் அடியாட்கள்
அரசியல் பலம், பதவி அந்தஸ்த்து கார் பங்களா
எல்லாம் சேர்ந்து நின்றாலும் அந்நேரம் வரும்போது
மரணமே மனிதனை ஆட்கொள்கிறது.
கடந்த ஒரு வாரத்தில் மரண ஊர்வலம்
 என்னைச் சுற்றி.
மரணதேவதை ஒவ்வொரு அசைவிலும் ஒரு காவியத்தைப் போல
துன்பகேணியில் தத்துவ நீரைப் பாய்ச்சிக் கொண்டே இருக்கிறாள்.
என் கணவரின் அண்ணியார் திருமதி சுதா சங்கரலிங்கம்,
என் உடன்பிறந்த சகோதரி , அக்கா சுசிலாவின் கணவர் மதன்,
இரண்டும் அடுத்தடுத்த நாட்கள்.. 
இதனால் ஏற்பட்ட பயண அலைச்சல் மன உளைச்சல்
 தீர்வதற்குள் நேற்று முன் தினம் இனிய நண்பர் கவிஞர்
பாரதிமணி என்ற கிங்க்பெல் அவர்களின் திடீர்மரணம்..
 நுகர்ப்பொருள் கலாச்சாரம் எப்படி எல்லாம்
மனித உணர்வுகளையும் உறவுகளையும் சிதைத்திருக்கிறது 
என்பதை மரணமும் உணர்த்துவது மரண அவஸ்தை.
1.
கணவரின் அண்ணியார் சுதா ஓர் அன்னலட்சுமி.
தனக்கு தன் பிள்ளைகளுக்கு மட்டுமே கவனமாக
 சொத்து சேர்க்கும் தலைமுறையின் சமார்த்தியங்களை அறியாதவர்.
எல்லோருக்கும் நல்லது செய்ய வேண்டும்,
எல்லோர் நலனிலும் மகிழ்ச்சியிலும் தன் வாழ்க்கையை
 அனுபவித்தவர். தான் இன்னாருக்கு இந்த நல்ல காரியத்தை 
செய்கிறோம் என்பதை அறிந்து செய்தவரல்ல. 
அவரைப் பொறுத்தவரை சுற்றமும் நட்பும் 
அருகிலிருக்கும் மனிதர்களும் ... இப்படியாக ..
எல்லோருக்கும் அவரவர் வாழ்வில் ஓடிப்போய் நிற்க முடிந்தது.
உதவி செய்வதற்கு பணம் மட்டும் தேவை
 என்று நினைத்திருக்கிறோம்.
இல்லை .. சுதா மாமியைப் போல ஒரு வாழ்க்கையை
 வாழ்ந்தவர்களுக்கு அது பொருட்டல்ல.
ஆலமரம் உறவுகளுக்கு மட்டும் நிழல் கொடுப்பதில்லை.
வழிப்போக்கனுக்கு அதுவே நிழல். அவள் ஓர் ஆலமரம்.
விழுதுகளுக்கும் அதுவே பலம். காதலைக் கொண்டாடிய பெண்.
அசாதாரணமான செயல்களைச் செய்து
 பலர் வாழ்க்கையில் விளக்கேற்றிய 
சாதாரணமான பெண்மணி. 
என்னைப் பிரமிக்க வைத்த இன்னொரு புத்தகம்.
இன்னொருவர் என் அக்காவின் கணவர் மதன்.
வங்கி அதிகாரி, பணி நிமித்தம் இந்தியா எங்கும் பயணித்தவர். 
அக்கிராமத்தில் அவர் தான் முதல் பட்டதாரி.
 தன் இருத்தலுக்கான போராட்டத்தில் இறுதியாக 
அவர்நேசித்தது தன் சொந்தக்கிராமமும் கிராமத்து மனிதர்களும்
தன் கிராமத்தின் ஆலமரமும் கண்மாய் கரையும்.
கிராமம் தன்னைத் தொலைத்துவிட்டது ,
கிராமத்தின் விளை நிலங்கள் விற்பனைக்கான
 பட்டாவாக பணமதிப்பீட்டிற்கு மாறியதை ஏற்றுக்கொள்ள முடியாத
அவஸ்தையில் .. .. அந்த ஏமாற்றத்தில் ..
.. மருத்துவர்கள் கார்டியக் அரஸ்ட் என்று சொல்கிறார்கள்.
மண்ணையும் மனிதர்களையும் இழந்து விட்டதை
ஏற்றுக்கொள்ள முடியாமல் போன 
ஒரு தலைமுறையின் எச்சம் அவர்.
நேற்று முன் தினம் என் நண்பர் பாரதிமணி...
 தன் இறுதிநாட்கள் வரை உழைப்பே தெய்வமென 
வாழ்ந்தவர். மும்பையில் நவீனகவிதை வரிசையில் 
அவர் மட்டுமே எப்போதும் தனித்துவமானவர். 
உப்பு புளி கவலையும் இன்றைய இருத்தலுக்கான
 தேவையும் ஓட்டமும் அவர் கவிதைகளைத் 
தின்றுவிட்டது. வீடு வாசல் பிள்ளைகளின் எதிர்காலம்
 என்று ஒவ்வொரு சராசரி மனிதனின் இருத்தல் போராட்டத்தில்
அவர் இளைப்பாற நேரமில்லை. கவிதைகளைப் பற்றி
பேசுவதற்கும் எழுதுவதற்கும் துடித்த அந்த உள்ளம்..
எளிமையும் கடின உழைப்பும்.. அவர் புன்னகையும்
அன்பும் பெண்களை மதிக்கும் பேராண்மையும்..
எழுதாத கவிதையாகிப்போனது ஒரு கவியுள்ளம்.

மரணம் மனித வாழ்க்கையில் புதிதல்ல.
மரணம் ஊரைக் கூட்டும்
மரணம் உறவுகளைப் பலப்படுத்தும்.
மரணம் மனிதர்களின் "தான்" என்ற
அகங்காரத்தை அசைத்துக் காட்டி
வாழ்க்கையை அர்த்தமுள்ளதாக்கும்.
மரணதேவதையின் இத்தத்துவங்கள்
கொஞ்சம் கொஞ்சமாக மடிந்து கொண்டிருக்கின்றன.
மரணம் என்னைப் பயமுறுத்தவில்லை
மனிதர்கள் என்னைப் பயமுறுத்துகிறார்கள்.
சுடலையாண்டவனை எரித்த தீயில்
நஞ்சுண்ட சக்தி .. பத்ரகாளியாய்..
சக்தியே சிவனாய்..
ஆதிபராசக்தியே அவனாய்...
ஆடைகளைக் களைந்துவிட்டு
சூல்கொண்ட கண்மாயில் அவள்.தரிசனம்..

பார்வதீ

Image result for lord shiva paintings artமழையும் வெயிலும் 


மண்ணும் மனிதர்களும்
 பயமுறுத்துகிறார்கள்.
கடலடியின் பவளப்பாறைகள்
காலடியில் அசைகின்றன.
வெற்றிடத்தில் ராகுவும் கேதுவும்
மோதிக்கொள்கின்றன
பிரபஞ்ச வெளியில் பரணி
மேஷத்திடம் தோற்றுப்போகிறாள்
காந்தாரி கட்டவிழ்க்கிறாள்.
கர்ப்பகிரகத்தில் சூர்யகிரஹணம்.
அடியே பார்வதீ.. தீ..
சுடலையாண்டவன்  மயானத்தீயில்
எரிவது தெரியாமல்
என்ன தவம் செய்கிறாய்..?


Monday, January 29, 2018

THE SAINTS OF SIN

THE SAINTS OF SIN -
(இன்று 15TH MIFF 2018 முதல்நாள்)
இன்று பார்த்த ஆவணப்படத்தில் இப்படம் என்னை ஏமாற்றவில்லை.
3 ஆண்டுகள் இப்படத்தை தயாரிக்க எடுத்துக் கொண்டேன்
 என்று சொன்ன இயக்குநர் அனிருத்த சென் 
இக்கதைகள் அப்பெண்களின் நிஜக்கதைகள் என்பதையும்
 சேர்த்தே அரங்கில் பதிவு செய்தார்.

பெண் அனுபவிக்கும் பாலியல் சார்ந்த கொடுமைகளும்
 பிரச்சனைகளும் ஆரம்பிக்கும் இடம் குடும்பம் என்ற 
அமைப்பிலிருந்துதான் என்பதை அப்பெண்கள் 
வெளிப்படையாக பேசினார்கள். ஒவ்வொரு பெண்ணும்
எப்படி தன் சார்ந்த பிரச்சனையை அணுகினார்கள் என்பதும்
 அவர்கள் கடந்து வந்தப் பாதையும் கண் இமைகளில்
 முட்டிக்கொண்டிருந்த அவர்களின் கண்ணீர்த்
துளிகளைப் போல சூடாக இருந்தது.
காசு பணம் கார் பங்களா குழந்தைகள் இப்படியாக வாழ்வின்
சகல வசதிகளும் இருக்கும் போது இபெண்களின் வாழ்க்கை
 ஏன் அதற்குள் தன்னைக் கரைத்துக்கொண்டு
 "இல்லத்தரசி"யாக இச்சமூகம் வரையறுத்திருக்கும் இலட்சுமண கோட்டைத்தாண்டாமல் வாழ முடியவில்லை?
எது இவர்களை விரட்டுகிறது?
பெண் என்பவள் சார்புநிலையைத் தாண்டிய
 ஒரு ஜீவன் என்பதும்
அவளுக்கும் தனிப்பட்ட விருப்பு வெறுப்புகள் ,
 புறம் சார்ந்தும் அகம் சார்ந்தும் இருக்கும் என்பதும்
 இப்பெண்கள் சொல்லும் உண்மை.
பக்தை மீரா அரண்மனையை விட்டு வீதிகளில் பஜனைப் பாடி
ஆடியதும் இம்ம்மாதிரியான ஒரு தேடல் தான்.
. கோபம், காதல், காமம், புணர்ச்சி, அழுகை, வேண்டியதை எல்லாம்
அடைய நினைக்கும் இயல்பு, மொத்தத்தில்
எதற்காகவும் யாருக்காகவும் இப்பெண்கள் 
தங்களை தங்கள் உணர்வுகளை
 ஏமாற்றிக் கொள்ள முயற்சி செய்யவில்லை. 
அவர்களுக்கான வாழ்க்கையை அவர்கள் விருப்பப்படி,
 யாரையும் ஏமாற்றாமல் தங்க்ளையும் ஏமாற்றிக் கொள்ளாமல் 
வாழவேண்டும் என்று விரும்புகிறார்கள்.
 அவர்கள் தங்களுக்கான் அப்பாதையை
 தேர்ந்தெடுத்துக்கொள்கிறார்கள். 
படக்காட்சிகளின் ஊடாக பாடிய பாடல்
கனிந்து குழைந்து அழுது அரற்றி சினந்து சீறி விலகி... காற்றில் மிதந்து... கொண்டிருந்தது.
 இனி, அப்பெண்களின் முகத்தை அவ்வளவு எளிதில் மறந்துவிட முடியாது.

Saturday, January 27, 2018

உங்கள் ஜாதகத்தை எழுதும் சமூக வலைத்தளங்கள்

சமூக வலைத்தளங்களில் உங்கள் ஜாதகம்
--------------------------------------------------------
Image result for negative effects of facebook

ஜன்ம நட்சத்திர ஜாதக கணிப்புகள் செய்யமுடியாத 
வித்தைகளையும் சேர்த்தே செய்துவிடுகிறது
உங்கள் கணினி தரவுகள். 
உங்களுக்குப் பிடித்தமானவற்றை
எப்போதும் காட்டிக்கொண்டே இருக்கிறது.
உங்கள் பயணங்கள், டிக்கெட் விவரங்கள்,
சாப்பிட்ட ஹோட்டல், சுற்றிப்பார்த்த நாடுகள்
என்று உங்களைப் பற்றிய தகவல்களை உங்கள்
டைரியிய போல முகநூல் போன்ற சமூக வலைத்தளங்கள் பாதுகாத்துவைத்திருக்கின்றன.
இதெல்லாம் கணினியின் பயன்பாடுகள் தானே என்று
சொல்ல வருகிறீர்களா..?
இதில் அவர்களுக்கு என்ன இலாபம்? என்று யோசித்துப் பாருங்கள்.
இத்தகவல்களைக் கொண்டு நம்மை எளிதில்
விற்பனை பண்டமாக்கி கோடிக்கணக்கில்
முதலீடே இல்லாமல் அவர்கள் வியாபாரம்
செய்கிறார்கள்!
கட்டணமே இல்லாமல் முகநூல் போன்ற 

இணைய தளங்கள் இலாபகரமாக இயங்கிக் கொ ண்டிருப்பதன்
 காரணம் இதுதான்.
இதை நமக்கான பயனிலையாக எடுத்துக்கொண்டு

 போக முடியாதா என்றால் அங்கேயும் 
ஏற்படும் சிக்கல்கள் உளவியல் சார்ந்ததாக
 இருப்பது கண்டுபிடிக்கப்பட்டிருக்கிறது.
லைக்ஸ் கள் , பின்னூட்டங்கள், மொள்ளமாரித்தனம்,
மொண்ணையான எழுத்துகள், மவுன யுத்தங்கள்,
இனம் புரியாத குழப்பங்கள்,
இப்படியாக எல்லோரையும்
டென்சனாக்கி தன்னைச் சுற்றி ஓட வைத்து
அதன் மூலம் தன் வியாபரத்தளத்தை உறுதியாக

 நிலைநிறுத்திக் கொள்கிறது சமூக வலைத்தளங்கள்.
பொய்யான தகவல்கள் மற்றும் செய்திகளை

 உருவாக்குவதிலும் சமுக வலைத்தளங்கள்
 முன்னணியில் நிற்கின்றன.
சமூக வலைத்தளங்களுக்கு யார் அதிகம் 

தீனிப் போடுகிறார்களோ அவர்களை அணுகி
 தங்கள் முகவர்களாக்கி கொள்கிறது இன்னும்
ஆபத்தாக இருக்கிறது.
அண்மையில் கிளம்பிய ஆண்டாள் சர்ச்சை
கூட இப்படியான ஒரு பரபரப்பு வியாதிக்குப் போட்ட

 தீனியோ என்ற சந்தேகம் எழுகிறது.
விளக்கு வெளிச்சத்தில்
சுற்றி சுற்றி வந்து செத்துமடியும்

 விட்டில்பூச்சிகளாகிவிட்டோமோ?
உணர்ச்சிகளைக் கிளப்பிவிட்டு
அதிலும் வியாபாரம் செய்த அரசியல் கட்சிகளின் 

அதே ஃபார்மூலவை இன்று உள்நாட்டு வெளிநாட்டு முதலாளிகள் 
சமூக வலைத்தளங்கள் மூலம் மிகவும் எளிதாக செய்துவிடுகிறார்கள்.
விருப்பமானதை மட்டும் எழுது என்பதில் இருந்த
சுயம் காயடிக்கப்பட்டு
மற்றவர்களுக்கு விருப்பமானதை மட்டும் எழுது
 

என்று எந்த ஓரு வெளிப்படையான அடக்குமுறையும் இல்லாமல்
 தன் வசப்படுத்தி இருக்கிறது சமூக வலைத்தளங்கள்.
இதிலிருந்து கொண்டே தான் 

இதைப் பற்றி எழுதியாக வேண்டும்
 என்பது என் போன்றவர்களின் நிலையும்
 சமூகவலைத் தளங்களின் வெற்றியும்!
வேறு என்ன சொல்ல!

Friday, January 26, 2018

ஜன கண மன அதிநாயக



"தீட்டு தீட்டு..தீ..ட்டு
ஜன கண மன அதிநாயக .."
Related image
எங்கள் குளியலறை சோப்புகளை-
அவர்களின் விளம்பரங்கள் தீர்மானித்தன.
எங்கள் அணிகலண்களையும் ஆடைகளையும்
அவர்களின் எந்திரங்களே வடிவமைத்தன.
எங்களுக்கு எந்தெந்த வியாதிகள் வரலாம்
அவர்களின் சோதனைக்கூடங்களே தீர்மானித்தன.
எங்கள் சமையலறை அவர்களின் மரபணு தோட்டங்களானது.
எங்கள் வாரிசுகள் என்ன படிக்கலாம் என்னவாகலாம்
அவர்களே முடிவு செய்தார்கள்.
எங்கள் அரசியல்வாதிகளின் எதிர்காலத்தை
அவர்களின் ஒப்பந்தங்கள் தீர்மானித்தன
எங்கள் கவிஞர்களின் விருதுகளை மட்டுமல்ல
கவிதைகளையும்
அவர்களின் விருந்துகளே முடிவுசெய்தன.
இப்போதெல்லாம்
நாங்கள் எதற்காக கோபப்படவேண்டும்
எப்படி கோபப்பட வேண்டும்
எவ்வளவு கோபப்பட வேண்டும்
என்பதையும் அவர்களே தீர்மானிப்பது
எங்களுக்கு அவமானமாக இருக்கிறது.
போங்கடா.. ம_ராண்டிகளா
முகத்தில் பட்ட ஆண்டாளின் எச்சிலை
அவன் துடைத்துக்கொள்கிறான்
தியானம் களைகிறது.
தீட்டு தீட்டு தீட்டு..
ஜன கண மன அதிநாயக ஜெயஹே
எல்லோரும் எழுந்து நிற்கிறார்கள்.
ஜெய் ஹிந்த்.

Wednesday, January 24, 2018

பெட்ரோ டாலரும் தீவிரவாதமும்

Image result for PETRO DOLLAR
#பெட்ரோ_டாலர் அலறுகிறது.. இனி
உலகநாடுகள் நிம்மதியாக இருக்க முடியாது.."
உலகச் சந்தையில் அனைத்து பொருட்களின் விலையும்
 பெரும்பாலும் அமெரிக்க நாட்டின் டாலரில் மட்டுமே 
பேசப்படுகிறது. ஏன்?

நான் வங்கியில் ஏற்றுமதி/இறக்குமதி துறையில் 
வேலை செய்த காலத்தில்( documentry credits, hundies, credit bills & agreements )
 அது தொடர்பான ஆவணங்களில் குறிக்கப்பட்டிருக்கும்
பணமதிப்பு டாலரில் மட்டுமே இருக்கும்
. ஏற்றுமதி /இறக்குமதி செய்யும் நாடுகளுக்கும் 
அமெரிக்காவுக்கும் தொடர்பு இருக்க வேண்டும்
என்ற அவசியமில்லை. இது ஏன்?
இந்தக் கேள்விக்கு விடை காணும் போதுதான்
உலகப் பொருளாதரம், ஆயுத விற்பனை,
 புதிது புதிதாக ஆண்டுக்கு ஒன்றாக ரீலிசாகும் 
புதுப்புது வியாதிகள், பின் அந்த வியாதிகளைக் 
குணப்படுத்த கண்டுபிடிக்கப்படும் மருந்துகள், 
மருந்து கம்பேனி கார்ப்பரேட் உத்திகள், 
ஆயுத பயிற்சிகளும் ஆயுத உதவிகளும் செய்வது போல
போக்குக்காட்டி தன் ஆயுதவிற்பனையில் கொடிகட்டிப்பறக்கும்
 போர் ஆயுத தளவாட விற்பனை ... 
இந்த விற்பனையின் பெருக்கத்தில் தற்காப்பு 
என்பதே அண்டைநாடுகளை எதிரிநாடுகளாக்கி 
தன் ஆயுதவிற்பனைக்கு அடிபணியாத மாடுகளை
 தீவிரவாதிகள் என்று சொல்லி 
உலக நாடுகளை ஓரளவு நம்ப வைத்து 
அடிமாட்டு விலைக்கு அந்த நாடுகளை கூறுபோட்டு
 வாங்கி ஏப்பம் விடும் பொருளாதர அடியாட்கள்..
இந்தப் பொருளாதர அடியாட்களின் சிந்தனையில்
 எல்லாமே அமெரிக்க டாலரின் மதிப்பில் தான் பேசப்படும், 
பேசப்பட வேண்டும்.
டாலர் யுத்தம் இரண்டாம் உலகப்போருக்குப் 
பின் இப்படித்தான் திசைமாறியது.
Image result for PETRO DOLLAR

 இப்போரில் டாலர் மட்டுமே ஆயுதம். டாலர் ஆயுதம்
இல்லை என்றால் நீ அவுட். செத்தப் பிணம் தான். 
1971 வரை நீங்கள் அமெரிக்க டாலரைக் கொடுத்தால்
 எப்போது வேண்டுமானாலும் அதை தங்க நாணயமாக 
மாற்றிக்கொள்ள முடியும்.
இம்மாதிரியான ஓர் அதீத நம்பிக்கை கொண்ட நாணய மதிப்பைக்
 கொடுத்து அமெரிக்கா தன் மதிப்பை உயர்த்திக்கொள்கிறது.
1971ல் பிரான்சு போன்ற நாடுகள் தங்களிடம் சேர்த்து 
வைக்கப்பட்டிருக்கும் அமெரிக்க டாலருக்கு ஈடான தங்கத்தை அமெரிக்க கொடுத்திருக்கும் வாக்குறுதிபடி கேட்க ஆரம்பித்த சூழலில் அமெரிக்க பொருளாதரத்திற்கு பெரியதொரு சிக்கல் ஏற்படுகிறது. 
அவர்களிடமிருந்த தங்கத்தின்
கையிருப்பு குறையும் ஆபத்து ஏற்படுவதை உணர்ந்து
தடாலடியாக அன்றைய அமெரிக்க அதிபர் நிக்சன்
"இனிமேல் அமெரிக்க டாலரை தங்கமாக மாற்றமுடியாது" 
என்று அறிவிக்கிறார். நிக்சன் கொடுத்த இந்த டாலர் அதிர்ச்சி 
"நிக்சன் ஷாக்" நிக்சன் அதிர்ச்சி என்றே அழைக்கப்படுகிறது.
Image result for PETRO DOLLAR

அதன் பின்னரான இஸ்ரெல் - அரபுநாடுகளின் சண்டையில் 
மூக்கை நுழைக்கிறது அமெரிக்கா. 
அரபுநாடுகளுக்கு ராணுவதளவாடங்கள்
கொடுக்கும் ஒப்பந்தம் கையெழுத்தாகிறது.
சவுதி அரசர் குடும்பம் தாம் அமெரிக்காவின் இந்த வலையில்
 சிக்கிய முதல் பொன்மீன். 
அவர்களின் ஒப்பந்தப்படி அமெரிக்க இராணுவ 
தளவாடங்களை கொடுக்கும் அதற்கு மாற்றாக
 சவுதி அரேபியா தன் எண்ணெய் கிணறுகளின்
 எண்ணெய் வியாபாரத்தை உலகில் 
எந்த நாடுகளுடன் செய்தாலும்
வாங்குவதும் விற்பதும் அமெரிக்க டாலரில்தான்
இருக்க வேண்டும். இப்படித்தான் பெட்ரோடாலர் பொருளாதரம் பிறக்கிறது.
 
சவுதி அரேபியாவைப் பின்பற்றி பிற அரபு நாடுகளும்
பெட்ரோடாலர் ஒப்பந்ததிற்குள் வந்துவிடுகின்றன
அல்லது வர வைக்கப்படுகின்றன.

இப்படியாகத்தான் நேற்றுவரை அமெரிக்க பெட்ரோடாலர்
 பொருளாதரம் உலகப் பொருளாதர சந்தையில் எல்லோரையும்
ஆட்டிப்படைக்கும் வல்லரசின் சக்தியாக 
தன்னை நிலைநிறுத்திக் கொண்டிருந்தது.
ஈராக்கின் அதிபர் சதாம் உசேன் அமெரிக்காவின்
 பெட்ரோடாலர் அடாவடித்தனத்தை எதிர்த்தார். 
இராசயண போராயுதம் இருப்பதாக
ஒரு புரளியைக் கிளப்பி ஈராக்குடன் போர் .. 
அமெரிக்க வென்றதும் மீண்டும் ஈராக் பெட்ரோடாலருக்கு
 அடிபணிந்ததும் அனைவரும் அறிந்த செய்தி.

தற்போது அமெரிக்காவின் பெட்ரோடாலருக்கு எதிராக
 சீனா பெட்ரோ யுவான் என்று தங்கள் நாட்டு பணமதிப்பில்
 வர்த்தகம் செய்யப்போவதாக அறிவித்து 
வர்த்தகத்தை ஆரம்பித்தும் விட்டது.
அதிலும் குறிப்பாக ரஷ்யநாடுகளிடமிருந்து 
பெட்ரோல் வாங்குகிறது தங்கள் கரன்சியான யுவான் மதிப்பில்.
அரபுநாடுகளிடமும் தன் பெட்ரோயுவான் வர்த்தகத்தை
 பேச ஆரம்பித்துவிட்டது சீனா.. 
Image result for PETRO DOLLAR
அதாவது இதுவரை பெட்ரோல் டீசல் எண்ணெய் வளங்களின்
 விற்பனை அமெரிக்க டாலரில் மட்டும் தான் நடந்தாக வேண்டும்
அதை மீறினால் என்ன நடக்கும் தெரியுமா..
நீ தீவிரவாதி,
உன் நாட்டு மக்கள் தீவிரவாதிகள், 
உனக்கு கொடுக்கப்பட்ட எல்லா உதவிகளும் 
இனி நிறுத்தப்படும், ஏன் உன் நாட்டு மக்கள்
எங்க அமெரிக்காவுக்கு வந்தா அவன் தீவிரவாதினு
 சொல்லி திருப்பி அனுப்புவேன்..
 நான் நினைச்சா என்ன வேணும்னா
செய்வேன்.. அய்யோ அய்யோ.."
பெட்ரோ டாலரின் அலறல் ஆரம்பித்துவிட்டது.

சீனா வின் நெடுஞ்சவர் எந்த ஓர் அசைவையும் காட்டாமல்
 குண்டூசி முதல் அழிப்பான் ரப்பர் வரை சீனாமேக்கிங்க்
உலகச்சந்தையில் கடைவிரித்திருக்கிறது.
இந்தியாவின் நிலைப்பாடு என்னவாக இருக்கிறது
என்பது பரமரகசியம்!
ஏனேனில் இந்திய ரூபாய் தாளில் 
அச்சிடப்பட்டிருக்கும்
"I PROMISE TO PAY YOU THE BEARER THE SUM OF ... RUPESS"
என்று சொல்லப்பட்டிருக்கும் சத்தியவாக்குமூலத்தை
உலகநாடுகள் நம்பத்தயாராக இல்லை! 

அதனால் "பெட்ரோ ரூபாய்" னு சீனாவுக்கு எதிராக
ஒரு பேச்சுக்கு கூட நம்ம ஆட்களால் பேசவே முடியாது.

( கட்டுரையை சுருக்கியும் உலக போர்,
 தீவிரவாதம், ஒப்பந்தங்கள் என்ற விவரங்களைத்
 தொடாமலும் பெட்ரோ டாலரை
யுத்தத்தை பேசி இருக்கிறேன். நன்றி நட்பே)
#பெட்ரோ_டாலர்

Wednesday, January 17, 2018

ஆண்டாள் எழுதிய திருவெம்பாவை..??

ஆண்டாள் எழுதிய திருவெம்பாவை
"ஓர் அறிக்கை தயாரிக்க கூடவா தமிழ் கூறு 
நல்லுலகில் தகுதியானவர்களுக்கு பஞ்சம் வந்துவிட்டது!"
அறிக்கையின் முதல்வரி :
"ஆண்டாள் தமிழச்சி, 3000 ஆண்டுகளாக பேசவும் எழுதவும் படும்
இழையறாத தமிழ்மொழியில் 1200 ஆண்டுகளுக்கு முன்பே
திருவெம்பாவை திருப்பாவை பாடியவர்...."

ஆண்டாள் கட்டுரை விவகாரத்தில் வைரமுத்துவுக்கு
ஆதரவாக வெளியிடப்பட்டிருக்கும் அறிக்கை
மின்னம்பலம் வாயிலாகவும் தோழி மீராவின் முகநூல் பதிவு
மூலமாகவும் அறிந்து... நொந்து நூலாகிப்போயித்தான்
இதை எழுதுகிறேன்.
ஒரு பிரச்சனை ஓடிக்கொண்டிருக்கிறது.
ஜனநாயக ரீதியாக கருத்து சுதந்திரம் என்ற ஆகச்சிறந்த
தளத்தில் நின்று ஓர் அறிக்கையைத் தயாரிப்பவர்களின்
தகுதியை இதை வைத்து நிர்ணயிப்பதா?
அல்லது நாங்க தான் மேதாவி, நாங்க சொல்றதுதான்
கனமானது என்ற கண்மூடித்தனத்தைக் கண்டும்
காணாமல் இருப்பதா?
இதெல்லாம் ஜஸ்ட் கவனக்குறைவு என்று மேம்பாக்காக
சொல்லவருபவர்களின் ஜஸ்ட் லைக் தட் என்ற
மனநிலைக்குப் போவதா..?
ஓர் அறிக்கை தயாரிக்க கூடவா தமிழ் கூறு
நல்லுலகில் தகுதியானவர்களுக்கு பஞ்சம் வந்துவிட்டது!
ஓம் நமசிவாய.
மாணிக்கவாசகர் எம் தமிழ் கூறு நல்லுலகை மன்னிக்க
வேண்டும்.

அறிக்கை :
Image may contain: 8 people, people smiling, text

இண்டலக்சுவல் பம்மாத்து

இண்டலக்சுவல் பம்மாத்து
சல்மாவுக்கு கொடுக்கப்பட்ட பெரியார் விருதைக்
 கொண்டாடும் போராளிகள் ,
 வளர்மதிக்கு கொடுக்கப்பட்ட பெரியார் விருதை மட்டும்
ஏன் கேலி கிண்டல் செய்கிறார்கள்?
பெரியார் பெயரில் கொடுக்கப்படும் "பெரியார் விருது"க்கும்
பெரியார் விருது பெறுபவருக்கும் என்ன தொடர்பு இருக்கிறது?
இதில் சல்மா தகுதியானவராகவும்
வளர்மதி தகுதி இல்லாதவாராகவும் பார்க்கும்
இண்டலக்சுவல் பம்மாத்து எதற்கு?
ஒருவருக்கு வெண்சாமரம்!
இன்னொருவருக்கு சாணி உருண்டையா!

வளர்மதியின் தீச்சட்டியில் பெரியார் தெரியவில்லை
என்பவர்களுக்கு
சல்மாவின் இலக்கியத்தில் எந்த வெங்காயத்தை
உரிச்சி பெரியாரைக் கண்டுபிடித்தார்கள்?
...
பெரியார் விருதுகள் உண்மையில் தந்தை பெரியாரின் 
வழி வந்தவர்களுக்கு அவர் கொள்கைகளில்
 நூற்றில் ஒரு பங்காவது சமூகவெளியில்
 செய்தவர்களுக்கு கொடுக்கப்படுகிறதா
அல்லது
எப்போதாவது ஊறுகாய் மாதிரி பெரியாரைத் தொட்டுக்கொள்ளும் பொழைக்கத்தெரிந்தவர்களுக்கு கொடுக்கப்படுகிறதா என்பதை
இனியாவது பெரியாரியக்க தோழர்கள்
 மனம் திறந்து பேசுங்கள்.

விருது விவரம்:
1995ஆம் ஆண்டு முதல் 24 ஆண்டுகளாக 
தந்தை பெரியார் முத்தமிழ் மன்றம் சார்பில்
‘பெரியார் விருது’ வழங்கப்படுகிறது.
இயல், இசை, நாடகம் ஆகிய துறைகளில் சிறந்து விளங்கும்
கலைஞர்களுக்கு பொங்கல் திருநாளையொட்டி இந்த விருது வழங்கப்படுகிறது.
இந்த ஆண்டுக்கான ‘பெரியார் விருது’ நடிகர் விஜய் சேதுபதி, கவிஞர் செவ்வியன்,
திரைப்பட இயக்குநர் கோபி நயினார், பறையிசைக் கலைஞர் வேலு ஆசான்,
ஓவியர் ஹாசிப்கான், நடிகர் ராதாகிருஷ்ணன் பார்த்திபன்,
மராத்தான் வீரர் சைதை மா.சுப்பிரமணியன் எம்.எல்.ஏ,
இன்னிசை ஏந்தல் திருபுவனம் ஆத்மநாதன்,
இயக்குநர் ஒளிப்பதிவாளர் செழியன், கவிஞர் சல்மா, ஓவியர் அபராஜிதன்
ஆகியோருக்கு ‘பெரியார் விருது’ வழங்கப்பட்டிருக்கிறது.
தமிழக அரசு வழங்கும் "பெரியார் விருது" இந்த ஆண்டு வளர்மதி அவர்களுக்கு வழங்கப்பட்டிருக்கிறது.